END-in vbch 20 hu a halral Police-in vbch.13 hu halral

END-in vbch 20 hu a halral
Police-in vbch.13 hu halral
June 26 kha khawvel puma ruihhlo hmansual leh tawlhruk do ni – International Day against Drugs Abuse & Illicit Trafficking a ni a. Mizoramah pawh hman niin, Excise & Narcotics Department chuan ruihhlo an man sa cheng vaibelchhe 20 chuang hu an halral a, Mizoram Police-in ruihhlo an man sa vbch. 13 chuang hu an halral bawk.
Mizoram Excise & Narcotics Department hian Aizawlah MLA T Lalhlimpuia hoin an halral a. Heroin kg. 25.284, a hlutna Rs. 7,70,66,058.72; ganja kg 202.379, a hlutna Rs. 16,19,035.68, methamphetamine kg 32.734, a hlutna Rs. 4,91,01,000; crystal meth kg 49.061, a hlutna Rs. 7,35,91,500; ruihna atana hman damdawi mum leh a tui chi chi hrang hrang nen, a vaiin Rs. 20,24,77,472.33 hu an halral a ni.
Heng ruihhlo halral hi Aizawl bakah district dang – Lunglei, Siaha, Champhai, Kolasib, Lawngtlai leh Mamit atanga case hrang hrang ami lakkhawm niin, a vaiin case 225 a ni.
Mizoram Police CID Crime leh Aizawl DEF-in ruihhlo an man an halral bawk a. DIG (CID) Dingluaia’n a hmanpui. Heroin kg. 8.224, a hlutna Rs. 2,46,72,000; methamphetamine kg. 87.07, a hlutna Rs. 11,31,91,000; ganja kg. 23.244, a hlutna Rs. 1,16,220; a vaiin Rs. 13,79,79,220 hu an tichhia a ni.
Heng ruihhlo tihral hi court-in tihral a phalsak tawh chin zel a ni.