Kawng chhia: sawrkar mawhphurhna a ni lo…?

Chief minister Pu Lalduhoma thusawi: “Kawng a lo chhiat hian tu mawhphurh nge tih hi hriat mai thiam hi a harsa a keini tan pawh hian, NHIDCL lampang nge Mizoram PWD mawhphurhna tih hi kan chiang lo thin a. Hei pawh hi a nihna takah chuan state sawrkar mawhphurhna a ni lo a ni,” tih video clip chu, social media lamah tun hnai khan thehdarh a ni a.
Tun lai hian Mizoram châk lakluhna kawngpui pawimawh ber chu a chhiat luat avangin Mizoramin harsatna a tawk mek tih chu mi tinin kan hria a. Kawngpui chhiat avanga tawrhna hi chu, kum tin fur ruahtui tlak laiin ‘a thleng ziah’ ti ila, kan sawi sual lovang; tawrhna a nasat leh nasat loh dan chu thuhran ni se.
Kawngpui siam chungchangah hian mipui lam chuan a technical thil - tunge implemeting agency ni a, tunge contractor tih te, engtin nge hna an thawh tihte hi kan zuk hre ve kilh kelh lova. Mipuiin kan hriat ve chhun chu  - ‘sawrkar laipui sum hmangin kan state kawngpui siam hna hi thawh a ni a, kan kawngpui tur chu a tha thei ang bera siam a nih theih nan a siamtute chu uluk tak leh taima takin Mizoram sawrkarin a lo vilin a lo enpui ang a, tichuan kawngpui tha tak kan nei ve ang’ tih a ni a. Kawngpui siamtuten kawngpui an siam chhiat leh an siam thatah, a ram leilung neitu sawrkarin mawh a phur a ni, kan tih tlat a rinawm. Kawngpui a that chuan, a that chhan chu sawrkar; kawngpui  chhiat chuan, a chhiat chhan pawh sawrkar. 
Kawngpui hi tha em em ta se, Mizoram sawrkarin kawngpui siamtute a vil uluk em vang a ni, tiin accountability lak hi kan tum leh tho ang em?  
Eng pawh ni se, central scheme hnuaia hmasawnna hna Mizorama thawh chi hrang hrangte pawh hi, a chhiat a thatah Mizoram hian mawh kan phur a, chu mawhphurhna chu kan kovah kan nghat ngam tur pawh a ni. 
Mizoram state tereuhte, mihring pawh tlemte awmna hian, sawrkar laipui scheme hrang hrangte hi, a ram leilung neitu nihna rilru dik tak leh thahnemngaihna dik tak nen lo hmang thin ni ila chuan, India rama state changkang ber kan ni thei tawh a, ‘model state’ kan ni pha daih tawh ang. Eng vanga chu chu la ni thei lo nge kan nih kan tih chuan, kan ram hruaitute hian leader quality sâng taka an dah ‘accountability’ hi an tlachham deuh thin em ni ang? tih hi zawhna pawimawh tak a ni awm e.