Se bo hnua se kawng khar ang

Kawnpui leh Sairang inkar kawngpui chhia chungchang ngaihtuahin nimin khan Mizoram PWD leh NHIDCL hotute an thukhawm a. 
Helai kawngpui chhiain hun rei tak mipui harsatna nasa tak a siam tawh hnuah a kaihhnawih department leh kawngpui siamtute an han thukhawm ve rap rap hi tlai tawh hle mah se, tlai avanga hma lak loh zui reng theih ni hek lo le, ‘a tha e’ tih loh theih pawh a ni lo. 
Hetiang hi kan pi leh puten, ‘se bo hnua se kawng khar ang’ (a pawi tawh hnua siam that) an lo tih thin kha a ni awm e. Kum tin fur laia inkalpawhna a chhiat thin dan hi a hrechiang ber state kan nih a rinawm; tawnhriat kan nei tha tlat. Kan state chhung kawngpui a that chang pawhin state danga inkalpawhna (road & railway) a chhiat avanga bungrua a lo luh theih loh chang pawh a awm thin; kan tawnhriat hnu vek a ni a, kan chiang tlang. A chutih thin avanga buhfai pawh thal laia stock thin tawh kan ni a, tunhmaa buhfai supply lama harsatna thleng thin ang kha, tun hnuah hi chuan fur ruahtui tlak hmaa lo inhmakhua nachang kan hriat tak chinah hian, harsatna lutuk kan tawk vak tawh lo niin a lang. Fur ruahtui a tlak hmain supply department chuan ‘fur chhung tla buhfai stock kan nei tawh’ tih mipui hnenah an puangzar thin. ‘Se bo hmain se kawng an khar’ a ni ber ang chu!
Kawng chhia hi ni sawm chhunga siam tha turin zirlai pawlte leh lirtheia eizawng pawlte chuan an phut a, hemi hun chhunga an siam tha lo a nih chuan an thiam ang anga hma lak an tum thu an sawi bawk a. 
Nimina Mizoram PWD leh NHIDCL hotute thutkhawmnaah hian, NHIDCL lam chuan, kawng siam that hna thawh a nih lai hian, PWD te tanpuina leh traffic management tha tak a awm theih dawn chuan ni 10 chhunga siam that theih an beisei thu an sawi a. 
Heta tanga zawhna lo piang ta chu, ni sawm chhung leka siam that theih tur ni si chu, eng vanga kha leh chen kha siam that lohva awm nge a nih? tih hi a ni ta a ni. Tuna NHIDCL-in an mawhpuh deuh bera lang ta chu, kawngpui siam laiin traffic management-ah Mizoram sawrkar lamin an tanpui lo tih hi. PWD lam pawhin, ‘helai kawngpui siam hna hi NHIDCL mawhphurhna alawm’ tiin mahni state kawngpui siamtute hnathawh dan pawh hi hriatpui an lo tum vak lo em maw ni teh reng ni!
Kan state chhunga hmasawnna hnathawh reng reng hi, a state neitu hian, hnathawktuten an thawk tha nge tha lo tih hi ngun taka kan lo vil hi kan tihtur liau liau a ni. ‘Hnathawktute mawhphurhna alawm’ kan tih liam mai zel chuan, kan state hian thil tha kan nei ngai lovang.