AR chhuahsan ramah Aizawl PSLen khawthawnna tur ruahman
Assam Rifles ram chhuahsan hmunah Aizawl Police Station dah rawtna chu a thuphunga pawm a ni a. Chhuahlamah kawngpui sial tum a ni a, mipui len khaw thawnna hmun zau siam tum a ni bawk.
Assam Rifles ram chhuahsan hman zui dan tur ngaihtuahtu Advisory Committee chu an chairman, chief minister Lalduhoma hoin Ningani khan an thukhawm a. Chairman chuan sawrkarin a duh dana thutlukna siam mai chu thaa an hriat loh avangin pawl hrang hrang aiawh telna Advisory Committee an din a. A tel tur awm ang chu an tel kim thawkhatin an hria tih a sawi.
Thutkhawmah hian Mizoram Synod atanga lehkha hmuh, AR ram chhunga mimal ram nei court thubuaia lut mek (pending case), AMC, GPC Mizoram State Assembly, Health, P&E leh PHE department atanga dilna lut an pharh.
Civil Hospital Aizawl Complex tihzauhna atana Aizawl Police Station awmna chu hman a nih theihnan AR ram chhuahsanah hian Aizawl PS dah nise, tia Health department dilna chu a thuphunga pawm a ni a, zirchian zui tum a ni.
PHE-in hmun thuma tui dahkhawlna siam an dilna pawh, an siam dan tur design hriatsak hmasak nise an ti.
Committee hian chhuahlam pangah kawngpui sial tha in a hria a. PWD-in an enfiah anga, mimal leh pawl hmunhma a khawih theihte zirchian a tum a ni.
UD&PA secretary Lalmalsawma Pachuau chuan master plan an ruahman chhin a sawifiah a. Khawvel khawpui changkang danga an neih thin ang - Culture & Nature Centre ngaihtuah chunga an duan a ni tih a sawi. A ram zawng zawng zatve aia tam (52.57%) chu hmun hring, mipui tana len khawthawn theihna turin an ruahman a, Advisory Committee hian an sawihoa, a tul anga sawizui zel tum a ni.
Thutkhawm zinga sawiho thenkhat:
8 AR ram chhuahsana Assembly House thar din rawtna chu hnawl a ni.
8 AR Cinema hall awmna chu parking hmun atan siam rawt a ni.
8 Saron Veng atanga Treasury Square-a chhuak tur kawng siam tha tih a ni a. Modern HSS thlanga BCM biak in awm chu a bulhnaiah a hu tawk ram sahthlak a, hemi atanga kal tura ruahman tum a ni
8 Synod ram nia ngaih AR biak in awmna chu a dinhmun dik takah tu ram mah ni rih lo, dinhmun chiang lo a nih avangin court thu nghah a ni dawn.