Sawhthing lei khawl sa tawih chhia an paih nasa

• Dr Lallianchhunga

Sawhthing lei khawl sa tawih chhia an paih nasa

• Dr Lallianchhunga
  Sawrkarin sawhthing a lei khawl sa chu a tawih nasa tawh a, hmun hrang hrangah paih a ni tih Congress thupuangtu Dr Lallianchhunga chuan a sawi a. Road map awm miah loa sawhthing hi buaipui a ni tih a lan thu a sawi.
  MPCC thupuangtu hian Ningani khan Sairanga sawhthing dah khawmna hmun tlawhin, sawhthing lei khawl sa Mizoram sawrkarin a buaipui zui dan a en a. Sawhthing lei khawlsa hi a tawih nasa tawh a, a tawih hi hmun engemawzata paih niin, ruahsurin len bo nual tawh mah se, sawhthing tawih an paihna sulhnu erawh hmuh theih a la ni tih a sawi.
  A hmunah Vai hoin kg.1 Rs.3 leh Rs.5 ten an lei a, mutia-in bag khatah Rs.10 hlawhin lirtheiah an dah lut thin. Mizoram sawrkarin sawhthing a lei khawl hi thar beisei zat atangin zaa 15.71 vel a ni a, thar chhuah tura beisei zat atangin zaa 84.29 a lei hman lo tihna a ni tih sawiin, ZPM sawrkar thil kalpui dan fuh lo avangin sawhthing chingtuten kg 1 Rs.50 aia sangin sawhthing an hralh theih loh phah tih a sawi a ni.
  ZPM sawrkar lakluh ni, 2023 December 8-a chief minister thar Pu Lalduhoma’n press conference a neih tuma a thusawi sawi chhawngin, “’Kan minister tinte hi an department chan theuh an enkawl dan tur road map ziakin kan nei vek a. Chu chu minister tinte kan pe vek dawn. Chumi dungzui chuan, a tlachawp niloin, ngaihtuah hranpa pawh niloin, kha policy kan lo duan tawh sa hmang khan an department chan theuh an enkawl dawn, tih thu a sawi a. Tuna sawhthinga kalpui dan buarchuar tak, kuthnathawktute tibeidawngtu hi ZPM sawrkar ‘road map’ ah a tel em,” a ti.
  Hmunphiah thar chhuah beisei zat atangin zaa 59.49 lei loh a ni a; aieng phei chu thar chhuah beisei zat atangin zaa 99.49% lei loh a ni tih Dr Lallianchhunga hian a sawi. “Thlai thlan chhuah lei a nih danah hian campaign laia sawi uar tak, research based-a tih engmah a awm lo tihna a ni em,” a ti bawk.
  Sumdawngten inhralh har an tih chhan chu kuthnathawktute leh mipui kuta sum a luh that tawk loh vang a ni ber tih a sawi a. Kuthnathawktute kutah sum lut tak tak se khawtualah sum lengvak a tam ngei tur a ni tih a sawi. “Hetiang sawrkar hi tunhmain Mizoramin kan la hrawn ngai lo a. Congress party chu ZPM sawrkar thlaktu turin mipuiin an beisei mek,” MPCC thupuangtu hian a ti.