Hokey lalpa Major Dhyan Chand
Hokey lalpa Major Dhyan Chand
A hmasaberin a pian leh murna leh a hun hmasa lam thlir ila.
A skill that lutuk avang leh a goal thun theih lutuk avanga hming lem atana ‘The wizard/The magician of hockey’ ti hiala an sawi thin Major Dhyan Chand hi kum 1905 August ni 29 khan ‘Dhyan Singh’ tih hming puin Uttar Pradesh khawpui Allahabad-ah a lo piang a.
A pa, Sameshwar Singh chu British Indian Army niin, hockey player tha tak a ni bawk.
A pa hi a hna avanga an sawn kual nasat em avangin Dhyan Chand-a zirna pawhin a tuar hle a, sikul hi kum 6 chhung bak a kal lo.
Kum 1922 khan kum 16 mi chauh niin a pa hnungzuiin Indian Army a zawm a, hockey pawh a khel ve nghal chat bawk.
Hockey game-a a tuizia leh talent a neih thatzia chu a coach hmasa ber Subedar-Major Bale Tiwari pawhin a hmuh hmaih hauh lo a, theihtawp a lo chhuahpui avangin hma pawh a sawn chak hle.
A hockey zirnaah hian a tuiin thahnem a ngai em em mai a, zan thla eng hnuaiah pawh amah chauhin a practice ngat ngat thin a, chuvang chuan a thiante pawhin ‘Dhyan Chand’ tiin an koh phah ta a, hei hi a hmingah a pu hlen ta a ni.
‘Chand’ tih hi Hidi-a ‘thla’ (moon) tihna a ni awm e.
A vanglai nite
Dhyan Chand-a’n international match a khelh hmasak ber chu kum 1926 kuma India Army hockey team-in New Zealand-a tour an neih tum kha a ni a; hemi tum hian a chetha em em a, Lance Naik-ah a kai san phah nghe nghe a ni.
1928 Amsterdam Olympic (Netherland)-ah khan India chu gold medal a lakpui a; he Olympic-ah hian match ngaah goal 14 thunin top scorer a ni nghal bawk.
A ball control tha lutuk avang leh goal a thun theih lutuk avangin ‘The magician of hockey’ tiin an ko fiam tan ta a ni.
1932 Los Angeles Olympic-ah khan India chu gold a lakpui leh a; final match-ah USA chu 24-1-in an sawp a; he final match-ah hian Dhyan Chand chuan goal riat zet a thun nghe nghe.
1936 Berlin Olympic (Germany)-ah khan a vawi thumna’n India chu gold a lakpui leh a; final-ah hian German chu 8-1-in an sawp hial a ni.
He final match-ah hian Dhyan Chand chu hliam avangin first half-ah a lut lo a, India chuan sikhat faiin hma hruai mah se Dhyan Chand-a ngaih a ngam thei thlawt lo a, second half-ah pheikhawk pawh bun loin(ke lawngin) a lut a, goal thum a la thun zui hram a ni!
Berlin Olympic-ah hian a goal thun thei lutuk leh a ball control tha lutuk avang chuan mipui lawm a hlawh hle a, German newspaper-te chuan an headline-ah ‘There is now a magic show in the Olympic stadium’ tiin an ziak kelh kulh hlawm a; tin, Berlin khawpui kawtthlerahte chuan ‘Go to the hockey stadium and see the magic of Indian magician’ tiin an tar chiai chuai bawk!
A hun hnuhnung
A vanglai hun 1926-1936 chhung kha ‘India hockey hun rangkachak’ (Golden period of India hockey) tia sawi thin a ni a; kum 1948 khan hockey khelh a chawlh san ta a ni.
A vanglaiin Olympic tum thumah match 12 a khel a, goal 33 lai a khung.
Kum 1926 atanga a chawlhsan ni thleng khan international match vawi 185 a khel a, goal 570 a khung hman a ni.
Chutiang khawpa mi ropui, hockey game tihlutu leh tiropuitu, India fapa chuam Dhyan Chand (the magician of hockey) chuan kum 1979 December ni 3 khan thin cancer avangin khawvel hi a chhuah san ta a ni.
A behbawm
Berlin Olympic-ah khan German dictator Hitler chuan an ram (Germany)-a pem turin a sawm hial a, a duh a nih chuan a sipaiah colonel rank pek a tiam bawk a, mahse, chu sawmna chu lawm takin a hnar a ni.
A ball control thiam leh tha lutuk kha a tiangkawmah magnet (ball hip thei) a dah ru a nih an ring a, Netherland ram hockey hruaitute chuan a hockey stick chu an phel darh sak vek a, mahse, stick dang ang tho a lo ni si!
India ram hmun hrang hrang leh ram dang Australia leh Austria-ahte pawh amah chawimawina’n a lim (statue) din/siam a ni.
A pian ni 29th August hi kum tinin National Sport Day atan hman thin a ni.
New Delhi-a national stadium chu a hming chawiin 2002 kum khan Major Dhyn Chand Hockey Stadium tia thlak a nih bakah London-a astroturf hockey pitch pakhat chu a hming puttir a ni bawk.
Kum 1956 khan India sawrkar chuan civil mite chawimawina sang Padma Bhushan a hlan nghe nghe a ni.
August ni 6, 2021 khan India rama infiammite chawimawina sang ber Rajiv Gandhi Khel Ratna Award tih thin chu Dhyan Chand chawimawina’n Major Dhyan Chand Khel Ratna Award ti a thlak a ni bawk.