Mawhphurtu nih an duh lohchuan a mawh kan lo la ang

• MBJP president

Mizorama kawngpui chhiat chhan leh nitin ei bar zawnna kawnga harsatna thleng mekah tumahin mawhphurtu nih an duh loh chuan BJP-in a mawh an la hre lo tih BJP State president Dr K Beichhua chuan a sawi a. An sawrkar loh vanga heng hi thleng a ni tih a sawi.
Zirtawpnia an party office-a inkhawmah BJP Mizoram president hian BJP-in ram hmasawnna a dah pawimawh hmasa ber a, a dawtah party, a dawt lehah mahni a ni, tiin, ‘nation first’ an tih avangin tunah chuan nasa takin India ramin hma a sawn tawh tih a sawi.
Inkalpawhna kawnga harsatna, nitin ei leh bar zawnna kawnga harsatna kan tawh mekah, Zoram hnufual chhanah hian mawhphurtu an awm loh chuan BJP Mizoram-in a mawh an lo la mai ang, tiin, “Heng hi state-a kan sawrkar loh vang a ni. BJP sawrkar ila chuan, vawiina kan harsatna tawh mek sutkian a ni dawn a, kan buaina bul ber, kawngpui tha kan nei thei dawn. Mizorama sawrkarna kan siam theih loh avangin kawng hrang hrangin kan tawrh phah a ni,” a ti.
Mizoramah hmasawnna hrang hrang kan hmuh theihnan BJP sawrkar siam turin thalaite lo chhuak turin a sawm tih Dr K Beichhua hian a sawi a. BJP a sawrkar chuan sawrkar hnaruak tam tak an dah khat thei dawn niin a sawi.
“Police-ah ringawt pawh hnaruak thahnem tak a awm. Heng hnaruak hi hnawhkhat thei tur chuan BJP sawrkar a ngai. A chhan chu, heng hna kan lak theihnan hian sum a ngaih avangin BJP kan sawrkar loh chuan a theih loh. Thalaite tan kawng hawnsak hi kan tih tur leh tum a ni a, miretheite chawikan an niha hmasawnna hmuh hi kan tum ber a ni,” a ti.