Driver tangkhangte ei tur pe tan

Driver tangkhangte ei tur pe tan
Kawnpui leh Sairang inkar kawng chhia siam mek a nih avangin Aizawl lam pan leh Silchar lam pan lirthei inkal chhawk dan ruahman thin a ni a, lirthei tangkhang an awm thin. Heng lirthei tangkhang khalhtute ei tur hi sawrkar chuan ngaihtuah tha tiin, Supply minister hoin a kaihhnawih official-ten an rel.
Kawng chhiat avanga oil leh supply dang phurtu lirthei an tangkhan dan enfiahin July 24 khan FCS&CA minister B Lalchhanzova chuan kawng chhiaa lirthei tangte chhuah theih dan a enpui bakah Vairengte-a oil depot thlengin a zuk enfiah a. Inrinni zing khan Kolasib-ah NH-06 kawng dunga lirthei khalhtu tangkhangte ei tur pek dan tur chungchangah Kolasib bialtu MLA, deputy speaker Lalfamkima, Kolasib bawrhsap Robert C Lalhmangaiha leh DC office-a officer-te, police hotute leh DCSO office lama thawktute an tel.
Lirthei tangkhang khalhtu leh enkawltute ei leh in tur ngaihtuahsak a pawimawh tih sawi a ni a. Buhfai sem tur leh ei tur leina sumfai an ngaihtuah fel nghal a ni.
Inrinni vek khan ei leh in tur ngaihtuah a, a mawmawhtute hnena sem hna hi Kolasib atanga hmarlamah chuan Kolasib District Tipper Owner Association leh Mizoram Truck Driver Association leh an phungbawmte kuta dah niin, chhimlam chu Sub-Hqrs. YMA Kolasib kuta dah a ni. A tum khatna ni turin lirthei khalhtute hi buhfai, dal, tel, purunsen leh tui thianghlim pek nise tia rel a ni a. July 27 – Pathianni chawhhnu lam atang sem tan tura tih a ni.
Vairengte-a IOC Ltd oil depot manager chuan Supply minister hnena a sawi danin, tunah hian oil phur lirthei 60 chuangin Mizoram an rawn lut mek a. Minister-in Vairengte-a supply kudam a tlawhnaah buhfai quintal 6000 chuang a awm a, kumin November thleng daih tura an ngaih thu thawktuten an lo hrilh.
NH 306&06 kawng chhia thawmthat mek a nih avang hian kawngpui dungah lirthei thahnem tak a tangkhang a. Lirthei tam zawk dinna hmun hi Rengtetlangsang, Bilkhawtlir, Bualpui, Kawnpui leh Khamrang bulah a ni.