Alex Warren ‘Ordinary’ aia Hot a la awm thei rih lo

Alex Warren hla hit ‘Ordinary’ chuan hla naran a ni lo tih lantir zelin, Billboard Hot 100 (singles) chart-ah a No.1 leh ta a, he chart-a kar riat a No.1-na a ni ta a, he chart-a a lan tan tirh atangin No.1 a la ni ta ngar ngar a ni, he hla awmna album “You’ll Be Alright, Kid” pawh Billboard 200 (albums) chart-ah No.5 a kai ta bawk.
Billboard Hot 100 chart hi kar khat chunga US-a hla lar dan tehna niin, chart ranking siam nan hian all-genre streaming (official audio leh official video), radio airplay leh sales data te chu tehna pawimawh a ni.
Alex Warren “Ordinary” hian stream maktaduai 20.7 leh radio airplay maktaduai 74 bakah sales 6,000 a la nei thei a, hei hi a kar riat nan chart-ah a No.1 pui leh ta a ni.
KPop Demon Hunters soundtrack HUNTRIX (EJAE, Audrey Nuna leh REI AMI) “Golden”-in stream maktaduai 25.7 leh radio airplay maktaduai 3.7 bakah sales 4,000 neiin, No.4 atangin No.2-ah a insawn leh hret a, he hla hi Streaming Songs-ah No.1 niin, 2013 hnua hmeichhe hlang group zinga he chart-a No.1 ni leh thei hmasa ber an ni.
Justin Bieber “Daisies” chu No.2-ah kar khat a awm hnuah No.3-a a tawlh ta a, he hla hi Bieber tan chart top 10-a lang thei hla 27 a neihna a ni. Chart No.1 hlui Morgan Wallen “What I Want” featuring Tate McRae chu No.3 atangin No.4-ah a tawlh a, Morgan Wallen hla dang, chart No.2 pawh lo ni tawh “Just in Case” chu No.5-ah bawk a la awm. Ravyn Lenae “Love Me Not” chu No.10 atangin No.6-ah a insawn ve thung a, ‘Love Me Not’ hi a hla he chart top 10-a lang thei hmasa ber a ni.
Chart No.1 hlui Teddy Swims “Lose Control” chu No.9 atangin No.7 a kai thar leh a, he hla hi March 2024 khan No.1 a lo zuai tawh a, chart-ah hian kar 101 a lang tling ta a, he chart a lang rei ber record a siam a sawhnghet leh sawt a, chart top 10-ah pawh kar 71 a lanna niin, he chart top 10-a lang rei ber record a siam a sawhnghet telh telh bawk.
He chart-a kar 19 No.1 ni thei, Hot 100 chart-a No.1 ni rei ber record nihrualtu, Shaboozey “A Bar Song (Tipsy)” chu No.6 atangin No.8-ah a tawlh a, chart-a kar 13 No.1 ni thei, Kendrick Lamar leh SZA “Luther” pawh No.11 atangin No.9 a rawn kai thar leh a, chart No.1 hlui, Lady Gaga leh Bruno Mars “Die With a Smile” chu top 10 khartu niin, No.10-ah bawk a la awm.