Cancer enkawl leh zirna hmunpuidin tumin sawrkar a inbuatsaih zel

On Jul 31, 2025 7 0

Cancer enkawl leh zirna hmunpui
din tumin sawrkar a inbuatsaih zel
Japan International Cooperation Agency (JICA) sum hmanga sak tur Mizoram State Super Specialty Cancer & Research Centre din tumin state sawrkar a inbuatsaih chho zel a. Nilaini khan chief minister Lalduhoma hoin a kaihhnawih sawrkar hotute an thukhawm.
A sakna tur sum hi JICA loan beisei niin vaibelchhe 700 senga din tum a ni a, chu’ng zinga vbch. 560 chu loan-a puk tur a ni. Detail project report hi Public Health Foundation India-in a siam a, 2023 February khan loan pe tura inremna hi sawrkar laipui leh JICA-in an ziak. Loan interest rate hi 1.5% niin, kum 2033 atanga rulh tan tur a ni.
Ruahman dan chuan he centre-ah hian cancer hospital building, nuclear medicine block leh staff quarters sak an ni anga, bungrua lamah PET scan/ SPECT scan, MRI 1.5 Tesla, CT scan 128 slices, PACS, RT-PCR/NGS leh a dangte a awm ang. Thawktute buatsaihna lam, cancer chungchang zau taka mipui hnena zirtirna kalpui thlengin a awm.
Project hi hlawm hrang hranga thendarh a nih avangin a indawta kalpui a ngai a. Project management consultant atan Mukesh & Associates – Oriental Consultants Global Co. Ltd ruat an ni a, soft component leh capacity building kalpui turin Nippon Koei India Pvt Ltd thlan an ni.
Thutkhawmah hian hnathawktu tur company tha leh rintlak ngei thlan chhuah a nih theihnan hma lak zui dan tur ruahman a ni a. A bawhzui tura ruatte a ranglamin an thukhawm leh ang.
Mizoram chu India rama cancer hmuh chhuah tamna ber (highest incidence) a ni a, kumtin India ramah mihring nuai khat zelah 98.5 chu cancer vei thar hmuh chhuah an nih laiin, Mizoramah chuan mihring nuai khat zelah 189.7 in an vei thar nia chhut a ni. Cancer vei, enkawl tura phai lama refer an tam a, sawrkarin sum a seng hnem thin hle.
Mizoram dinhmun hi India ram pum nena khaikhinin a dangdai bik lehzel a, India rama cancer langsar panga indawt dan chu – hnute, chawkawng, chhul, chuap leh ka chhung a ni a, a hmasa pathum hi a dapchhuahna (screening) tur sum central fund a awm a. Mizorama cancer langsar panga indawt dan erawh – chaw kawng, pumpui, chuap, hnute leh chhul an ni. Central screening fund hman theih lohna pathumah cancer kan vei nasa bik tihna a ni.
Hetiang a nih laiin, cancer tuartute enkawlna hmun bik – comprehensive cancer centre kan la nei si lo a. Super Speciality Cancer & Research Centre din hi tulin sawrkar chuan a hria a, Cancer Hospital Zemabawk ram hi tinzawn a ni.