Angola-a tuialhthei man sang duh loh lantirnaah mi pali thi
Angola-a police-te chuan an khawpui, Luanda-a lungawi lohna nasa taka lantirnaah mi pali thah an nih thu leh mi 500 chuang man an nih thu an sawi.
Petrol man sang lutuk duh lova taxi puten ni thum chhung nawrh an huaihawt kal mekah tuna thil thleng hi tun hnaia an rama lungawih loh lantirna zau leh mi tibuai ber tling a ni mek.
Thawhtanni khan mi sang telin nawrh hi zawmin kawngpui an dang a, dawr an rawk a, lirthei an tichhia a, police nen an innawr bawk.
Thawhtanni zan atang khan an khawpui hmun thenkhatah silai ri hriat tur a awm bawk.
Thawhlehni pawh Luanda hmun tlem azawnga nawrh hi huaihawt leh niin police nen an innawr a, dawr rawk a ni bawk a. Nawrhna hian an ram lailia Huambo khawpui a kang kai bawk.
“Tuialhthei man sang hi vantlangin lungawi lohna an lantirna chhan pakhat mai a ni tawh a, retheihna a nasa a, mi retheite an mangang tak zet a ni,” tiin tual chhunga activist hriat hlawh, Laura Macedo-i chuan BBC a hrilh.
Taxi pute hian tuialhtheia hausa tak rama sorkarin July thla tira tuialhthei man a peksak thin (subsidy) tihtawp tuma diesel man 33% chuanga a tihsan duh loh lantir nan nawrh hi an huaihawt a ni.
Hei hian khawpuia chengten veivah nana an hman ber, taxi chuan man a tito va, ei tur leh ni tin mamawh man pawh a phurhna man san tel avangin a to phah bawk.
Hetih lai hian President João Lourenço-a chuan lungawi lohna lantirtute thil sawi chu a dik lo tih sawiin petrol man chu hniam tak a la ni reng niin a sawi.
“A man a pun hnuah pawh Angola-a diesel man hi litre-ah US cent 40 chauh a ni a, khawvel ram dang tam takah hetianga tlawm hi hmuh tur a awm lo,” tiin CNN Portugal-in tun hnaia an kawmnaah a sawi.
Thawhtanniah hian mi tam tak Luanda hmun thenkhatah fuankhawmin tuialhthei man sang duh lohna an aupui a, kum 50 dawn MPLA party-in ro an rel tawhna an duh khawp lohna an aupui bawk.
Sorkar chanchinbuin social media-a an thil tihchhuah thin pangngai tichhuaka nawrhna huaihawt engmah an tilang lo chu an dem bawk.
Luanda-a tual chhung thuneitute chuan Thawhtanni vek khan thuchhuah siamin taxi pute pawlin nawrh an huaihawt chu an inbiak hnuah tihtawp a ni tawh tih an puang.
Hetih lai hian tute nge an nih hriat loh taxi nena inzawm mi thenkhatin an la kalpui a, mi tithaihin tharum an thawh zui tih an tar lang bawk.
Taxi association lian, Anata chuan Thawhtannia tharum thawhna thlengah an tel loh thu an sawi a, ni thum lungawi lohna an lantir erawh an chhunzawm dawn tih an sawi thung.
Thawhlehni chawhnu thleng khan dawr, bank leh sumdawnna hmunte la khar a ni a. Sorkar hna thawkte kal leh tawhin mi mal company-a thawkte erawh in lam atanga thawk tura tih an ni.
Police chuan khawlaiah an patrol a, buaina siam chu an hmachhawn zel dawn tih an sawi.