Anfield atangin Diaz inpuchhuak ta nge nge

Colombia rama an hel pawl tihbaiawm takin a pa an rukbo laia Liverpool chhungkua leh fans lainat hlawh Luis Diaz chu a team-mate Diogo Jota vuinaah hmuh tur awm ve loin an ram lama party a chhim lai thlalak hmuh tur a awm a, Reds mite thin a tirim hle niin a lang a, chu chu a chhuah chhan a nih chiah em tih phei chu a nemnghehna hmuh tur awm lo mah se Bundesliga champion Bayern Munich lamah a chhuak fel ta!
Kum 2022 January thla khan Liverpool-in FC Porto atangin sum hmahruai pound maktaduai 37 thehchhuak chungin an senglut a, England rama kum thum leh a chanve a cham chhungin a hlawhtling hle a, game 148-ah goal 41 thun tlingin, trophy lian pali lai a lakpui hman.
Reds-a a season khatnaah FA Cup leh EFL Cup la nghalin, 2022 Champions League final-a Real Madrid hneh lo team-ah khan a tel a; season liamta khan inelna hrang hrangah goal 17 khungin a career-a a chetthat ber hun a tawng a, Liverpool chu Premier League champion a nihpui.
Kum 28 mi chu England leilungah hlawhtling teh mah se tun nipui insuan hun laia hralhchhuah tur list-ah a tel zui ta tlat a; a hmalam hun a chian loh ruai avangin Inrinni pre-season match-a AC Milan laka 4-2-a an tlawm tum pawh khan squad-ah telh a ni lo.
Tun thlatir lam khan Bayern-in pound maktaduai 58.6-a lei an dilna chu Premier League club hian an hnawl a, a hnuah Bavarians lam hian an ngamna zat san chhoin, pound maktaduai 65.5 chu Liverpool pawm theih chin a ni ta a, Diaz pawh Germany rama medical test hmachhawn phalna pek a ni zui ta a ni.
A man chungchanga club pahnih inrem hnuah Luis Diaz chuan German champion-ah klum li daih tur contract a ziak a; Liverpool mangtha pahin Anfield-ah khan a duty a hlenchhuak vea a hriat thu leh a team-mate Jota thihnain tlakbuak lo phei se a chhuah dan chu club mangtha theih dan tha ber a nih thu a sawi.
Instagram lamah Diaz chuan, “Drem tam tak nen Anfield ka thleng a, tah chuan engkim kan hlawhchhuakho dial dial a, hmai zangthal ha chungin ka chhuahsan thei vein ka hria.
“Liverpool-ah khan mihring duhawm ber ber, thawhpui namen lo leh kawng tam taka min puitu coach rual ka tawng a, fans lah an pui a ni tawp mai.
“Liverpool hi special team an lo ni chiang khawp mai a, ka thinlungah ka vawng reng tawh ang.
“Duty hlenchhuaka inngai chunga chhuah ngat hi chu rilru a nuam veng veng mai a, chu’ng zawng zawng ai chuan champion chunga chhuah hi a la turu zawk a, chhiatnain min tlakbuak lo phei se la chuan kan inmangtha dan hi duhthusam a ni ngei ang,” tiin a khelhpui Diogo hming a lam chhuak a, an theihnghilh ngai tawh loh tur thu sawi chungin a chhuahsan tak club chungah engkim avangin lawmthu a sawi.
Colombian winger an hralhchhuah leh tak hnuah Liverpool hian tun nipui chhungin player hralhna manah pound maktaduai 115 vel an rut tling tawh a, chu chuan Florian Wirtz, Hugo Ekitike, Jeremie Frimpong leh Milos Kerkez-te mana an sum sen a phuhruk hle a ni.