Russia-in zana Kyiv a beihnaah mi 15 thi

Last updated Aug 2, 2025 6 0

Russia-in drone leh missile hmanga Nilaini zana nasa taka Kyiv district hmun tam tak a beihna leh apartment a kah chhiatnaah mi 15 an thi a, mi dang 145-in hliam an tuar bawk niin thuneituten an sawi.
Thi zingah hian mipa naupang kum ruk mi leh a nu pawh an tel a, Ukrainian khawpuia hmun 12 chuang kah fuh a ni.
Ukraine-a interior ministry chuan hliam tuar zingah naupang 14 an tel tih a puang a, Kyiv mayor chuan indona a chhuah hnua zan khat thila an khawpuiin a tawrh nat ber a nih thu a sawi.
Russia hian US President Donald Trump-a’n Moscow vaua Vladimir Putin-a’n August 8 hmaa inkahhai tura inremna a siam loh chuan na zawka hrek tum mah se nasa takin a bei chhunzawm zel.
Nilaini zana a beihah hian Russian drone thawm chu darkar tam tak chhung hriat tur awmin thil puak ring tak tak pawh a tam hle.
Russia hian drone 309 leh cruise missile pakua hmangin a kap niin Ukraine-a air force chuan an sawi a. Air defence system hmanga a tam zawk lo dan ni mah se tam takin an tum an fuh niin an sawi.
Tun hi Trump-a’n Putin-a a vau thar leh hnua tum khata Kyiv an beih nat leh ber a ni a. Na zawka hrek tuma vauna hian Russian president kal dan a tibuai lem lo niin a la lang rih.
Hetih lai hian Russia hian indona mualah pawh hma an sawn zel nia sawiin khawchhak lam, Donetsk region-a tlang chhip khaw pawimawh, Chasiv Yar an la niin an sawi.
Ukraine chuan hei hi a dik lo tih sawiin inbeihna a la kal zel niin an sawi ve thung.
Kyiv beihnaa thi pathum hi mihring chenna apartment block kah fuha mi an ni.
Thi zat hi a tirah sawi tlem mah se Ningani zan khan interior ministry chuan 15 an nih tawh thu leh chhanchhuah hna an thawh zel thu a puang.
Kyiv-ah hian Sviatoshynskyi leh Solomyansky district te chu beihna tuar na zual niin mi pakhat thiin mi 20-in hliam an tuar niin Interior Minister Ihor Klymenko chuan a sawi.
Shevchenkivskyi district-ah hian thil puak nghawrin naupang damdawi in tukverh darthlalang a tikeh nasa niin Kyiv mayor chuan a sawi a. Zirna sang zirna in, sikul leh kindergarten te pawh a chhia tih a sawi.