Territorial Army part time-a thawh tur

Territorial Army part time-a thawh tur
Mizoram-a Territorial Army din tur chu part time-a thawh theih a ni dawn a, NGO-ah a inhman theih anga, politics thlengin a khelh theih dawn tih MLA Lt.Col. Clement Lalhmingthanga chuan a sawi.
Mizoram-a Territorial Army (TA) din tumnaa sawrkarin an awmna tur hmunhma zawng tura a din Coordination & Land Search Committee chairman Lt.Col. Clement Lalhmingthanga chuan Thawhtannia ZPM office-a inkhawmah TA chu chief minister hmalakna in Mizoramah din a ni dawn a, sawrkar laipui leh state sawrkar tangdun din tur a ni tih a sawi.
TA chu ram leilung fa Mizote tan a hlu dawn a, sipai dang ang lo takin mahni ramah pension thak thlenga awm theihna a ni dawn tih a sawi. “Part time job a ni dawn a, hei tak hi a thatna tur a ni ang. Sipai ni chungin eng hna pawh a zawngin a buaipui thei dawn a, sipai dang ang lo takin NGO-a inhman, politician thlengin a nih theih. Home posting hlang hlakin pension thleng an thawk thei dawn a, a dil turten tul leh pawimawh hrang hrang buaipui ngai leh an tlin ngeina turin an tana tangkai thei training buatsaih mek a ni,” a ti a. Tling ngei turin thalaite inbuatsaih turin a chah.
Kum 2024 atang khan chief minister Pu Lalduhoma hmalaknain Mizoramah din tura hma lak a lo ni tawh tih MLA hian a sawi a. International border thui tak kan nei a, thenawmah rambuai Myanmar leh chhak lamah India nena innghirngho fo China a awm a, thlang lamah Bangladesh awm bawkin, India leh Mizoram tan TA mamawhna a sang tih a sawi. A bultannan mi 70 lak a ni anga, thawh hnihnaah 140 lak tum niin, Mizo hlang batallion a ni dawn tih a sawi a ni.