Bualte bul kawng a tlang

Lawngtlai leh Lunglei inkar, National Highway-54 Bualte leh Thualthu inkara leiminin kawng a hnawh chu Thawhtanni tlai dar 5.00 vel khan lirthei te (LMV) chin kal theihin tih tlang a ni a, lirthei tangkhang engemawzat an chhuak a ni.
Tarlan tawh angin helai kawng hi August 2 chawhnu dar 2-3 inkar khan kawng chhak lei tawlhin a hnawh a, tih tlang a nih hnu lawkah lei hi tawlh lehin kawng hai tlangtu excavator chawpin a hnawl thla a, excavator operator erawh him dam taka lakchhuah a ni.
Hemi hnu hian kawng hi a tlang zui ta lo a, Bualte leh Tualthu lamah mikhual tangkang engemawzat an awm a, VC leh YMA-in an ei leh in tur bakah riahna tur an ruahman sak a ni.
Heng khaw pahnihten ei leh in an siamna man hi District Disaster Management Authority Lunglei chuan a rulhsak dawn bakah khualzin tangkhang zingah heng khaw puitu an awm a, bialtu MLA Lalramliana pawhin sumfai a thawh bawk.
Thawhtanni khan lehlam lehlam atangin excavator-in kawng hi an hai rawn a, tlai dar 5.00 velah LMV chin kal theiha tih tlang a ni. Hemi hma hian ke in khualzin tangkhang tam zawk chu an lo kalkai tawh a ni.