SIR sawiin INDIA hruaitute thukhawm dawn

Eptu party tangrual, INDIA hruaitute chuan Ningani hian zanriah kila thutkhawm an tum a, Special Intensive Revision (SIR) chungchanga hma lak dan tur an sawi ho dawn nia sawi a ni.
An thutkhawm tukah hian Election Commission of India (ECI) pisa pana SIR an kalpui duh lohna lantir nana kawng zawh an tum bawk nia sawi a ni.
SIR chungchang hi parliament thutkhawm neih mekah sawi a hlawh hle a, eptute hian sawiho ngei an phut laiin rorel lam tangrualte chuan chutiang hawi zawngin engmah an la ti lo.
INDIA-a tel party hruaitute hi Ningani hian zanriah kil pahin hma lak zel dan tur an sawiho dawn nia sawi a ni a. He thutkhawm hi vice president thlan tur hma lawka neih tur a ni bawk a, eptu tangrualte hian a huhova chuhtu tur siam ngei an tum nia sawina thawm a ri mek bawk.
Eptu party-te hian Bihar-a SIR kalpui chu an duh lo hle a, vote nei tam tak hming telh loh theihna tur nia ngaiin ‘vote-bandi’ tih leh ‘vote-chori’ tiin an sawi a. INDIA-a telte hian parliament chhung leh pawnah an duh lohna an lantir mek zel a ni.
Parliamentary Affairs Minister Kiren Rijiju chuan Zirtawpni khan eptuten sawiho an phutna chhangin Lok Sabha speaker hlui, Balram Jakhar-a thu lo sawi tawh sawi chhuakin rorelna inah ram danpui tlawhchhana din, ECI ang chite chu an chet dan sawi a rem lo tih a sawi.
Hetih rual hian Lok Sabha leh Rajya Sabha inkhawm kaihruaitute thu thu a nih bawk thu a sawi.
Eptute erawh chuan sawiho a nih hma chu sawiho phutna an lantir zui zel dawn tih an sawi a, parliament-ah sawiho theih a nih dawn loh chuan fur thutkhawm kal mek chu engmah lovah, rorel mumal theih lohvin a liam dawn tihna a ni mai thu an sawi.
Trinamool Congress hruaitu, Derek O’Brien-a chuan Pathianni khan eptute chuan parliament rorel kal dan leh thil sawiho tur chungchangah ‘Modi-a sorkar nghing mek’ chu ‘inzirna’ an pe dawn tih a sawi.
Rorel lai, BJP chuan Bihar-a SIR kalpui mek sawiho chu ‘an hlau’ nia sawiin he thil kalpui hi ‘thawm nei lova vote tihchingpenna’ a nih thu a sawi bawk.
“SIR (Silent Invisible Rigging) hi awlsam takin rorelna in hnihah sawiho theih reng a ni a. BJP chuan an hlau va, tihbuai mek an ni,” tiin TMC hruaitu hian X-ah a tar lang.
“Thawhtanni atang hian Modi-a kaihhruai tangrual hi sawiin Parliament dan leh kalphung zirtirna kan pe dawn a, thil sawiho dan kan zirtir dawn,” a ti.