Wimbledon champ Swiatek an vaw tla!

Pathianni khan IGA Stadium-a Canadian Open round of 16 match pakhatah Wimbledon champion leh tournament second seed ni bawk Iga Swiatek chu kum 22-a upa Clara Tauson hneh loin a tla fel der!
Dane Tauson hian a hmaa ding kha six-time Grand Slam champion tih a hre lo nge 7-6(1), 6-3-in a hneh ringawt a, Poland nula kha Montreal khaw tournament kal laia top player tla hnuhnung ber a ni rih.
On-court interview-ah Tauson chuan thli avanga inkhelh a harsat thu sawi chungin a theihtawp chhuaha a beih hram hram thu leh cool raiha khel turin a insawrbing tih a sawi a, set hnihna a break chiah khan inrintawkna a neih thu leh hnehna a sualchhuah avanga a hlim em em thu a sawi.
Seeded 16th Tauson hian quarter-final inkhel pakhatah Madison Keys tumin, big-serving American hian last eight a luhna kawngah rim taka thawk chungin Czech Karolina Muchova lakah 4-6 6-3 7-5 hnehna a sual chhuak hram a ni.
Kumin January thla khan Tauson lakah Keys hi Auckland khawpuiah a lo tlawm tawh a, mahse, kha mi thla vek khan Australian Open kaltlangin a Grand Slam title hmasaber a sualchhuak zui ta tho a ni.
Swiatek-i tlawm hma ni chiah khan top seed Coco Gauff pawh rin loh takin Canadian tleirawl Victoria Mboko tihte mai mai chuan straight sets hmangin an lo hneh tawh bawk a; Swiatek leh Gauff hian tun thla tawpa khelh tan tur U.S. Open tan hma ngeia an game an tahhriam deuh a ngai dawn niin a lang!
IGA Stadium-a fourth round inkhel dangah world number one hlui Naomi Osaka erawh a chesual duh lo a, minute 49 lek chhungin Anastasija Sevastova lakah 6-1 6-0 hnehna awlsam a chang a; tun kha kum 2024 Doha tournament hnu lama Japanese player-in WTA 1000 event last eight a luh leh vawi khatna chiah niin, thla 19 hnuah heti ang tennis level sang chin quarter-final a thleng leh ta hram a ni.
Four-time Grand Slam champion Osaka hmachhawn leh tur hi kumin Wimbledon finalist Amanda Anisimova hnehtu Ukrainian Elina Svitolina a ni.
Ukraine top tennis player Svitolina hian Montreal khuaa WTA 1000 hard-court tournament-ah a khawngzia a lantir chhunzawm zel a, American Anisimova (USA) lakah 6-4, 6-1 hnehna chang lehin, he inkhel hian darkar khat leh minute 27 a awh.
Tun hi season kal laia Svitolina-i’n WTA 1000 quarter-final tum li a thlenna ni tawhin, Canadian 1000-level event bika last eight a chuankai vawi lina a ni nghal bawk.
He hmuna quarter-final match a khelh hnuhnun ber chu kum 2028 daih tawh kha niin, Canada rama a result neih that ber chu Toronto khawpuia 2017 title a lak kha a ni. Canadian Open hi kum tin Montreal leh Toronto khuaah an innghah chhawk thin a ni.
Svitolina hmachhawn leh tur world No. 49 Naomi Osaka of Japan nen hian tunhma lamin tum sarih an lo intum tawh a, tah chuan Osaka hi head-to-head (4-3) tehnaah a chungnung zawk a ni.
Montreal tournament kal laiah hian Ukrainian dang Marta Kostyuk pawhin quarter-final lut turin American McCartney Kessler lakah hnehna a chang ve bawk.
World number one leh U.S. Open defending champion ni bawk Aryna Sabalenka erawh Montreal-ah hian a inlan lo teh tlat.
Toronto khawpui lama Canadian Open mipa tournament bik kal mekah Alex de Minaur chuan American seventh seed Frances Tiafoe lakah 6-2 4-6 6-4 hnehna changin, ninth-seeded Australian hian Canada a pan hma chiah khan ATP 500 Washington Open title a la a; a career-a Masters 1000 title hmasaber tur a beisei zui leh mekna kawngah 6-4 4-6 7-6(1) Italy player Flavio Cobolli hnehtu American Ben Shelton nen semi-final luh an inchuh ang.
Russian sixth seed Andrey Rublev pawh quarter-final lut zingah telin, he tournament last eight a luh vawi khatnaah hian a vannei tel ve pah bawk a, 7-6(3) 6-7(2) 3-0-a hma a hruai mek laiin a tumpui Spaniard Alejandro Davidovich Fokina a inhnukdawk a, hahdam deuh zawkin a tlang.
Second-seeded American Taylor Fritz pawhin 19th-seeded Czech player Jiri Lehecka laka 7-6(4), 6-7(5), 7-6(5) hnehna changin quarter-final a lut.
Denmark star leh he tournament-a seeded fifth ni bawk Holger Rune chu rin loh deuhin Alexei Popyrin lakah 6-4 2-6 3-6-in a tlawm.