Awm bawr nâ ni si lo, lung chak lo tih inhriat theih dan

Awm bawr nâ ni si lo, lung chak lo tih inhriat theih dan
Lung (heart) lama that lohna kan neih chuan kan âwm bawr chu a rawn lanchhuah hmasakna tur niin kan ngai deuh thup thin. Awm bawr a rawn nat tawh chuan heart attack kan hlauthawng nghal viau zel a nih hi. Mahse, awmbawr na hi thil chi hrang hrang avangin a awm thei tih hriat tel tur a ni a, indigestion avang te, awm bawr tihhliam vang te, khuh nasat avang te pawhin a awm thei.
Tin, awmbawr na ringawt hi lung lam fel lo lanchhuah dan a ni lo tih pawh hriat tel tho tur a ni a, case thenkhatah chuan lung lam that lohna chu symptom awm miah lo te pawh a rawn thawk thut thei bawk. Chutiang chu ni mah se lung lam harsatna kan nei tih mahni inrinhlelh theihna tur, kan taksaa rawn lang chhuak a awm thin a, awmbawr na hi chu kan hriat tlanglawn tawh sa a ni a, tun tumah hian Times of India-in awmbawr na ni si lo, lung lam fel lo tih inhriat theihna ni a an sawite kan rawn tarlang e.

1. Thawk kham lo/ thaw chham: Eng emaw i tih vang te, i taksa hah vang te pawh ni chuang lo a i thawk i kham lo a, thawchham lek lekin i awm a nih chuan i lung lam fel loh vang a ni. Lung a chak loh chuan lung-a thisen luang vel a lo tlem a, chu chu chuap-a tui awm te pawh a thlen thei. Step-a kal satliah emaw kawng kal satliah emaw, nitina kan tih thin thil dang kan hahpui ngai em em ni si loah te pawh thawk kham lo, thawchham lek lek leh thawk harsa ang te pawhin a awm thei. Zan mutnaah thaw chham ang deuha awm thut te pawh a ni thei a, kan lukham pangngai kham chunga mut chuan thawk lama harsatna a awm deuh avanga nidang aiin lukham kan mamawh sang ta riau te pawh a ni thei.
2. Chau leh zawi deuh ngawih ngawih: A chhan hriat tur awm si lo a chau leh zawi deuh ngawih ngawih, awm hahdam deuh vang vang pawha ziaawm hleithei lo te hi lung lam fel lo vang a ni thei. Kan lung atanga oxygen tamna thisen te kan taksa leh tihrawl peng hrang hranga a insem darh that loh vang a ni thei. Nidanga harsatna nei lo a step i kal thinna te kha i hahpui ta riau emaw, i bazar bag ah i hahpui ngai loh te kha i chauhpui ta riau emaw te a nih chuan lung lam fel loh vang a ni thei. Nidanga harsatna nei lem loa kan tih theih te kan hahpui ta viau a, kan ti peih lo ta riau a nih chuan lung lam fel lo vang a ni thei. Hetianga chau leh zawi hi chu hnathawh leh eng emaw kan tih avanga kan chau leh zawi nen a inang lo a, awm hahdam pawhin a reh ve mai thin lo.
3. Ke vûng: Lung tha lo kan neih chuan thisen a pump tha thei lo a, chu chuan taksa hmun hrang hrangah fluid accumulation a thlen thin a, taksa vûng a lo awm thin. A bikin kephah, kheimit leh ngalrek bawr velah te a vûng a lang chhuak duh lehzual. I din rei deuh emaw, i thut rei deuh emaw hnuah a rawn vûng nasa lehzual ang a, taksa hnuailamah nuam lo te pawh a awm thei.
4. Luhai leh ngaihtuahna chiang lo deuh riai: Lung-in thisen a pump that loh chuan thluakin thisen a dawng tha lo a, thluakin thisen a dawn that loh chuan luhai, ngaihtuahna chiang lo, ni deuh riai ang te pawhin kan awm thei a, luhai avanga tluk te pawh a awm thei. Taksa a chak lo a, khur deuh der der ang te pawhin a awm thei.
5. Lungphu mumal lo: Lung phut dan hian kan lung hriselna chungchangah thil thui tak a entir thei a. Lung a chak loh chuan lung phu a mumal lo a, a muang lutuk emaw a rang lutuk emaw a ni thei. Hetianga kan awm chuan keimahni pawhin kan awm bawrah phu deuh dup dup ang te pawhin kan hre thei. A chhan leh vang hriat tur awm si loin lung a rawn phu rang zawih zawih a, kan awm hahdam pawhin awmzia a awm chuang lo. Hetiang hian second reilote emaw minute eng emaw zat a rei te pawh a ni thei.
   Lung hrisel nan eng nge pawimawh? Lung tana chaw tha, thei leh thlai, whole grain lam ei tam tur a ni a, chi al, thil thlum leh thau mawm te ei tlem tur a ni. Mahni taksa zawh tawkin exercise lak thin tur a ni a, mei zu mi i nih chuan sim la, zu pawh in loh a tha ber a, i in lo thei lo a nih pawhin tlem tlem chauhin in ang che. Rilru tih hah vak vak loh dan te ngaihtuah a pawimawh bawk e.
   Engpawh ni se a khat tawka doctor rawn thin a pawimawh a, a chunga kan tarlan symptom te hi kan nei a nih chuan doctor rawn tur a ni. Mahni tawkin kan BP te in-check fo tur a ni a, cholesterol level te pawh a khat tawka check fo a tha a, kan taksaah thau a tam mah mah a nih chuan intihcher deuh te pawh tum tur a ni.