Tlawng leh a fintu luia bawlhhlawh paih zel chuan NGT-ah zualko tum

Centre for Environment & Social Justice chuan Aizawl tui tlan Tlawng leh a fintu luite ho titawp thei bawlhhlawh chi hrang hrang paih a nih lohnana hma lak a nih loh chuan National Green Tribunal-ah thlen an tum tih an sawi a. Hma la tura an ngen angin Aizawl district magistrate chuan heng luia bawlhhlawh paih titawp turin thupek a chhuah.
Environment humhalh kawnga hma latu Centre for Environment & Social Justice (CESJ) hian August 4 khan Aizawl district bawrhsap hnenah lehkha thehlutin, Serlui leh Tlawng lui humhim turin an ngen a. Hemi ang hian district magistrate ni bawk bawrhsap hian thupek a tichhuak a ni.
“Aizawla chengte tui lakna ber Tlawng luia luanglut turin leivung, plastic ip leh um ruak, in sak leh thiahna hnawm tawih thei lo leh mihring ek leh bawlhhlawh kan paih nasa hle a. Humhalh loha hnawmhnawk chi hrang hrang kan paihte Tlawng-ah a luanluh zel chuan nasa takin kan hriselna a pawi zawngin a la nghawng dawn a ni,” tiin, district magistrate hian, danin thuneihna a pek angin mipui zawm turin thupek a chhuah.
‘Aizawl district huamchhungah heng – leivung, lung nawi (stone dust), plastic atanga thilsiam leh bawlhhlawh chi hrang hrang Tlawng luia luanglut turin mi tumahin an paihin an thehthang tur a ni lo,’ a ti a. Thupek zawm lo chu Section 223 BNS 2023 hmangin an chungah hremna lek a ni dawn, tiin, thupek hi chhuah a nih atangin thla hnih chhung a huam dawn tih a sawi a ni.
CESJ chuan thupek ang hian Tlawng lui leh a fintu, tuihawk luankawr (seasonal river), luite hna nei (perennial river) ah bawlhhlawh chitin, septic tank khat, leivung leh stone dust paih tawh lo turin pik-up leh 407 truck khalhtute an ngen tih a sawi a. District magistrate hnena an ngenna hian awmzia a neih loh chuan National Green Tribunal (NGT) ah lungawilohna an thehlut tawh dawn tih a sawi.
‘State sawrkarin bawlhhlawh a sawngbawl that loh avanga kan mualphona hian a vawrtawp a thleng tawh a, kan mualpho piahlamah kan nunna hnar – luiah bawlhhlawh tawih thei lo, leivung leh stone dust kan paih nasat avangin furah lui tui eiin tlak lohin a nu a. Lui chhuata bawlhhlawh chitin reng a khah avangin lui a pawnlang vek tawh a, thalah tui a kangchat a. Tun atanga thih thaa kan humhim loh chuan kan chan tur chu sik leh sa chingpen vanga raltlan (climate refugee) a ni,’ CESJ hian a ti.