Kawng chhiat vangin thingpui lamah harsatna
Mizoramin ni tin mamawh thil hrang hrang a lakluhna kawng a chhiat avangin mipuiin kawng hrang hrangin harsatna an tawk a, thingpui neih loh phah te pawh an awm.
Mizoramah bawnghnute a thleng mumal lo rei tawh a, chawlhkar thum vel chu mipuite hman ber amul gold a thleng tawh lo. Minister leh MLA pakhat ve ve zelin kawng siam hna ni 10 an vil hnuah pawh a la thleng lo!
Bawnghnute thleng mumal lo hian nghawng a nei thui a, thingpui dawrte’n thingpui an neih loh chang te pawh a awm. An neih pawhin an senso a pung.
Treasury Square-a restaurant hlun pakhat chuan August ni 5 khan thingpui an nei lo, bawnghnute a awm loh avangin. A tukah chuan an nei, amul gold a man tova lei tur an hmuh avangin.
“Amul gold thleng lo hian keiniho hi min nghawng a, thingpui pawh kan siam theih loh hnuah hei, vai dawr pakhatah kan hmu fuh hlauh mai,” chu restaurant enkawltute chuan an ti.
Tel pawh lo la lawk lo se chu an nghei tawh ang tih an sawi a, an lak lawk avangin tel an la nei tih an sawi rual hian, “A rei tawh mah mah chu a ni, hetiang a nih chuan kan nghei har lo ang,” an ti. An thenawma restaurant dang pakhat pawhin amul gold an neih loh avangin bawnghnute dip an hmang tih an sawi.
Office canteen pakhat te chuan amul gold an neih loh thu, August ni 5 khan vai dawr pakhatah an hmuh fuh thu, Rs 80 man kha Rs 100 an lei thu an sawi.
Every day hmang an awm a, Rs 80 man kha Rs 100-in an lei a, everyday an hmanin a letin senso a tam tih an sawi.
Bawnghnute a thlen mumal loh avang hian lassi siam thin thenkhat chu an chawl rih a, chu chuan an pek thin thingpui dawr a nghawng ve leh.
Bawnghnute van thu hi social media lamah pawh fiamthu thawh nana hmang an awm a, whatsapp status lamah pawh amul gold neih vanga intihtheihna lam fiamthu hmuh tur a awm.
Thingpui dawr thenkhat chuan eirawngbawlna gas lamah pawh harsatna an tawk tih an sawi a, black market-a Rs 1250 te, Rs 1300 tea an lei thin kha Rs 1500 man a nih tawh thu an sawi. Tel pawh a thleng mumal lo rei tawh a, hei hian thingpui dawr thenkhat a nghawng. An hman ber best choice a van thu leh a awm ang ang pawh a man a pun thu sawi an awm a, dawr pakhat chuan best choice hi Rs 120-a an lei thin kha hun engemaw chen chu Rs 140-a an lei tawh thu sawiin, ni khata bu 10 vel hmang thin tan chuan hei hi a hek hle tih an sawi.