Bangladesh inthlan hun atan February ruahman
Bangladesh chuan lungawi lohna lantira prime minister an paih thlak hnuah February hian an inthlang dawn ta tih an ram hruai hna thawk lailawk mektu chuan sorkar paih thlak champhaah a puang.
Muhammad Yunus-a hian ‘zalen vawi hnihna’ tiha an sawi, sorkar paih thlak champha lawmna hun tawpah an inthlan hun tur hi a puang a ni.
Sheikh Hasina-i chu nikum August 5-a zirlai kaihhruaia a sorkar duh lohna nasa taka lantira paih thlak a nih hnuah India-ah a tlan chhia a, kum 15 chhung ro a relna a tawp.
Nobel Prize dawng tawh, Yunus-a hi a hnuah a lailawka sorkar kaihruaitu atan ruat a ni a, sorkar kalphung siam that tumin a intiam a mi thenkhat erawh chuan a tum a hlen thei bik lo va, dan leh thupek kenkawhna kawngah pawh a la nghet lo hle niin an sawi.
An ram politician zingah pawh inthlan hun tur atana duh dan a inang lo hle a, Yunus-a pawh hian June, 2026 vel a lo rawt tawh.
Hetih lai hian Bangladesh Nationalist Party (BNP), Islamist Jamaat-e-Islami party leh zirlai kaihhruai, National Citizen Party (NCP) chuan Thawhlehnia Yunus-a’n an khawpui, Dhaka-a inthlan hun puanna hmunah hian tha takin an tawiawm thung.
A hnuah Yunus-a hian Election Commission hnenah ‘Ramadan hma, February, 2026-a inthlan buatsaih tura ngenna a thlen dawn’ tih a sawi.
Hasina-i’n ro a rel lai khan mihring dikna chanvo palzut leh amah eptute lung ina dah an tam hle.
Zirlaiten lungawi lohna an lantir chhan bul ber erawh sorkar hna lak tura hna hauhsak tam lutuk duh lohna a ni a, July atanga bei tanin August, 2024 khan paih thlak a ni ta a ni.
Paih thlak a nih hnuah Awami League chu an rama awm khap zui a ni a. Mi thiamte chuan a thlawptu mi eng emaw zat an chungthu ngaihtuah lohva thla 12 lai lung in tantir pawh an awm niin an sawi.
Thawhtanni khan Bangladesh khua leh tuite hnenah Hasina-i chuan lehkha thawnin a kal bo mai dawn loh thu leh kum 2024-a thil thleng kha ‘sorkar laka helna’ niin a sawi.
Hasina-i hi thubuai tam tak awrhtir niin amah awm lo chungin a chungthu pawh ngaihtuah a ni a, an puhnaah erawh engmah thiam lohna a nei lo niin a insawi.