Match thum goal 36 khung thei Mizoram team!

Kakinada, Andhra Pradesh-a khelh mek 15th Hockey India Junior Women National Championship 2025-ah Mizoram junior team chuan match thumah goal khat mah chhuah loin goal 36 tehreng an tilut!
Mizoram hian an match hmasaberah karliamta Zirtawpni, August ni 1, 2025 khan Rajasthan chu 12-0 tehrengin an sawp a; a tuk, Inrinnia an match hnihnaah pawh Gujarat chu si kaw faiin an nawp leh a; an match hnuhnung ber tunkartir Thawhtanni khan si 15 teh meuhin Telangana an sawp leh bawk!
He tournament-ah hian Mizoram hi Pool B, Division C-ah Rajasthan, Gujarat leh Telangana-te nen an awmho a; kumin atang hian he tournament-a tel state hrang hrangte hi division thum (A, B, C)-a then an ni a, he’ng division thenna atan hian nikum lama state tinte performance kha hman a ni.
Nikumah khan Mizo-ram hi senior lamah an tel avangin junior lama tel tur player an nei daih lo a; chuvang chuan an tel ve thei ta lo a, kuminah hian Division C-ah an awm phah ta a ni.
Hetiang hi ni mah se kumina an chetthat em avang hian division sang zawkah an kai chiang hle a ni.
Mizoram coach Miss Lalrothuami leh manager Miss Chamteite chuan khelmual tha leh academy neih tlem luat avanga player duh khawp an nei thei lo thin chu pawi an tih thu leh he’ng avanga harsatna Mizoramin kan tawh fo thin hi kan sawrkar zara a tawp thuai an beisei thu an sawi bawk.
Mizorama hockey zirna pahnih kan hriat thin chu Thenzawl lama hmeichhe inzirna hmun leh Kawnpuia mipate pual academy hi a ni a; he academy pahnih behchhan hockey khelmual bak hi tun thlengin state khat ve riang ruang Mizoramin hockey turf kan nei lo!
Heti chung hian hockey chu Mizo thalaite ei hmuhna game thawhhlawkberte zinga mi leh international thlenga Mizote min chawisangtu sport langsar a ni a; hockey game buaipuitute’n sawrkara khelmual an tahawh ngawih ngawihna hi Mizoram sawrkar pawhin mena a thlak mai a rem tawh lo!
Hmeichhe pual bik hockey zirna pakhat chauh nei Mizoramin vairam state lian zawk, academy ngawt pawh 20 chuang lai nei leh chu’ng atanga player tha tha an duh ang ang thlang thei state-te kan tleirawlte’n an zu hneh fo thei thinte hi a ropuiin a chhuanawm a, he’ng hlawhtlinna an sualchhuah tawh zozaite hi sawrkar hruaitute bengharhtu a tlin loh chuan hockey game buaipuitu leh hmangaihtute tan chuan a beidawnthlak duh khawp ang le!