MNF-in zalenna puan kum 60-na nasa taka lawm tum

Mizo National Front chuan 1966 March 1-a Mizoram independence a puan champha kum 60-na, Diamond Jubilee chu 2026 March 1-a tanin, kumtluana hman tumin a inbuatsaih a, Celebration Committee a din chu a tum khatna atan an chairman, party senior vice president Dr R Lalthangliana kaihhruaiin an thukhawm.
Zofate tana zalenna puan champha lawmna chu Mizo nationalism puanzarna atan leh Zofaten thuk zawka hnam rilru kan putna tur lam hawia hman nise, an ti a. Mawhphurhna hrang hrang chanvo insiamin Sub-Committee 7 din a ni. Zalenna puan kum 60-na lawmna hi Zoram pum huapa hman tum niin, MNF Sub-Headquarters leh Block hrang hranga bawhzui turin ruahmanna duan tum a ni.
Chairman chuan Zofaten zalenna hmu tura kawng kan zawh mekah hian zalenna puan hun champha chu urhsun leh ngaipawimawh taka hman a tul a, Mizo hnam hlut tak leh dah pawimawh tlat chunga zalenna sual a ni chu hriatreng phu leh Mizote tan dai tawh ngailo tur mellung pawimawh a ni tih a sawi.
MNF vice president Vanlalzawma pawhin hnam chanchina chhinchhiah tlak leh hlu ber zing ami Mizoram zalenna puan champha chu Mizoten kan hlut deuh deuh tur leh chhuang taka hnamdang hnenah pawh kan sawirik tur a ni, tiin, he ni pawimawh ngaihlut kawnga thangtharte tana kawng sat eng zeltu tura inbuatsaih a tul tih a sawi a ni.
Committee vice chairman, MNF treasurer Lalruatkima chuan kan hnamin a bula let leh a, hnama chhiar ve kan nihna tura kan pasalthate sulhnu hnutchhiah theihnghilh lo leh ngaisang tak chunga kan hnam chawisang zawnga kan pen nat deuh deuh a tul tih a sawi a. Hnam chhuanawm leh rintlak kan nihna pawh pholan uar zel a tul a, engkim chan huama zalenna sualtute chu kan zah a, kan ngaihhlut deuh deuh a tul, tiin, independence puan Diamond Jubilee lawmna buatsaih hian a tha thei ang bera Mizo hnam tan nghawng a neih ngeina turin inbuatsaihna kalpui a ni dawn tih a sawi.