India leh Pak navy-ten Arabian Sea-ah nunchan zir rual dawn

On Aug 12, 2025 4 0

India leh Pak navy-ten Arabian Sea-ah nunchan zir rual dawn
Indian Navy chuan Thawhlehni leh Thawhlehni hian Arabian Sea-ah nunchan an zir dawn nia hriat niin news agency ANI chuan Pathianni khan a tar lang tawh a. Hetih hun lai vek hian Pakistan Navy pawhin Notice to Airmen (NOTAM) chhuahin an ram tuipuiah nunchan an zir ve dawn.
Arabian Sea hi tuipuia sumdawnna kalkawng lun tak leh a chhehvel ram him leh him loh lanna pakhat a ni a, he hmuna hun inang deuh chiaha ram inhal tak lawng sipaite nunchan zir tur hian ngaihven a hlawh hle.
May thlaah ram pahnihte hi an indo va. May 7 khan India hian April 22-a Pahalgam-a firfiakte chetna kal zelah Pakistan leh Pakistan-occupied Kashmir (PoK)-a mi firfiakte tawmna hmun a bei a. Hei Pakistan chuan chhang letin drone leh missile hmangin India a bei zui a, Indian sipaite che velehin Pakistani air base 11 a kap.
May 10 khan ram pahnihte hian Line of Control-ah inkahhai an puang zui ta a, sipai chakna hmanga inbeihna an chawlhsan.
Tun hnaia parliament rorel inkhawma Indian sipaiten Pakistan-a Operation Sindoor an kalpui sawihonaah Indian Prime Minister Narendra Modi chuan Pakistan-a Director General of Military Operations (DGMO)-in inkahhai puan kha a ngen niin a sawi a. “Pakistan khan, ‘Min chhu na lutuk, engmah kan ni dawn lo,’ an ti a. Indo titawp turin min ngen a ni,” a ti.
Modi-a hian Operation Sindoor kha Pahalgam-a mi firfiakte chetna chhan letna a nih thu a sawi a. “May 6-7 zan khan kan duh ang takin beihpui kan thlak a, Pakistan-in engmah tih theih an nei lo. Minute 22 chhungin April 22-a beihna phuba kan la a ni,” a ti a, Pakistan khan India chetna avang khan nuclear ralthuam hman tumin a vau niin a sawi bawk.
Prime minister hian beihpui an thlaka thil lang pathum a sawi bawk a. “Mi firfiakin India a bei a nih chuan kan duh danin, kan dinhmun azir leh hun kan tihah kan chhang let ang. Nuclear hmanga intihthaihn awmzia a nei dawn lo. Mi firfiakte thlawptu sorkar leh firfiaka chetna duangtu chu kan en hrang dawn lo,” a ti.