Gaza luah tumna Netanuyahu-a’n indo tihtawpna tur tha ber a ti

Gaza luah tumna Netanuyahu-a’n indo tihtawpna tur tha ber a ti
UN ambassador-ten Israel-in Gaza City thunun a tum chu an sawisel nasat hle karah Prime Minister Benjamin Netanyahu-a chuan indona tihtawpna tur ‘tha ber’ niin a sawi.
Thuthar lakhawmtute a kawmnaah Netanyahu-a chuan ‘thu dik tawk lo leng’ vang a nih thu sawiin ruahmanna chu ‘rang taka Hamas laka Gaza chhuah zalenna tur’ a nih thu a sawi.
Gaza-a Israeli hren mekte chu ‘tam tuar’ awm chhun nia sawiin Gazan-te a hrek riltam nia puhna a pha.
Israel-in Gaza City thunun vek a tumna hi United Nations (UN) Security Council thutkhawm hmanhmawhah sawisel a hlawh hle a; UK, France leh ram dangte chuan ‘mihring dikna palzutna’ thleng palh thei a ni tih an sawi.
Denmark, Greece leh Slovenia pawhin thutlukna chu thlek leh ni se an duh tih an sawi a, ‘mi hrente hruai haw theihna tur a ni dawn lo va, an nun tihderthawn zualna mai a ni’ an ti.
Council member dangte pawhin tha an ti lo va. China chuan ‘a huhova Gaza mipuite hremna’ chu pawm chi a ni lo tih sawiin Russia pawhin ‘inhren behna’ tiin a sawi bawk.
UN Assistant Secretary General Miroslav Jenca chuan thutkhawmnaah hian, “Ruahmanna hi kalpui a nih chuan Gaza-ah chhiatna dang thlentirna tur a ni dawn a, ram pum buaina leh baihvaihna, inthahna leh chhiatna thlen zelna tur a ni,” a ti.
US erawh chuan Israel ruahmanna thlawpin Ambassador Dorothy Shea chuan thutkhawmah hian US chuan mi hrente chhuah nan leh indo a tawp nan ‘rim takin a thawk’ tih a sawi a, council chuan chu chu engmah a ngaihsak lo niin a sawi.
Indona chu ‘Hamas-in an mi hren an chhuah chuan vawiinah a tawp nghal ang’ tih sawiin UN member-te chu an thutkhawm hi ‘Israel-in mi a suata puh turin’ remchangah an hmang a, he puhna hi ‘a dik lo hulhual’ niin a sawi bawk.
Israel-ah pawh mi tam takin an ram ruahmanna chu mi hrente nun tiderthawngtu tura ngaiin duh lohna an lantir.
Netanyahu-a hian Israel Defense Forces (IDF)-te chu Hamas la chakna hmun hnih, Gaza City leh al-Mawasi chhu chhe turin a ti.
Gaza-a puihna pek dan tur thuang thum duangin heng zingah hian him taka puitute an kalna tur siam leh Israeli sipai leh an thawhpui dangten tam zawk puihna an thlak pawh a tel.
US leh Israeli thlawp Gazan Humanitarian Foundation (GHF)-in puihna an semna tur hmun him tam zawk siam a tel bawk.
Gaza-a Israeli la hrente chungchag zawhnaah 20 an la dam nia an ngaih thu a sawi a, ‘engmah kan ti lo a nih chuan an zalen dawn lo’ tih Netanyahu-a hian a sawi.
Israeli hruaitu hian Gaza-a naupang ei tur kham lo thlalak darhte chu Hamas tlangauna nia sawiin ‘a lem’ tih a sawi.
Indo chhungin Israel hian ram dang chanchinbumiten Gaza-a luh a phal lo va, Netanyahu-a hian a sipaite chu ni hnih luhtir turin a phalsak.
October 7, 2023-a Hamas-in Israel beia mi 1,200 chuang an thah leh hren tura mi 251 a hruai hnua Gaza an beih zuinaah hian mi 61,000 chuang an thi tawh.