Cincinnati-a bul tan fuh Alcaraz leh Zverev

Cincinnati-a bul tan fuh Alcaraz leh Zverev
Lindner Family Tennis Cente, Cincinnati, OH, USA-a Cincinnati Open khelh mekah Pathianni zan khan Spaniard Carlos Alcaraz chuan set hnihna hloh chungin Bosnian world number 56 Damir Dzumhur lakah 6-1, 2-6, 6-3 hnehna a chang a, a tournament khelh hnuhnung paruka final a luh vekna chhawmnunga final khelh leh a tumna kawngah second round a paltlang leh ta phawt.
Second-ranked Spaniard hian a match khelh leh turah chuan tun aia khelh that a mamawh tih sawi chungin a bul tan dan erawh a tha thawkhat tih a sawi a; Serbia player Hamad Medjedovic a hmachhawn leh hunah kha aia la chet that lehzual a duh thu a tarlang tel.
Inkhel dangah German third seed Alexander Zverev pawhin home hope Nishesh Basavareddy lakah 6-3, 6-3 hnehna nuamsa changin third round a lut ve bawk.
2021 champion Zverev hian third round match pakhatah American Brandon Nakashima a hmachhawn leh ang.
Canadian Open winner Ben Shelton pawhin Argentina star Camilo Ugo Carabelli inhliam khel chhunzawm thei lo avangin round sang zawk hi hahdam zawkin a lut ve bawk.
Toronto khawpuia title hlawhchhuak chunga a career tuaihriam leh mek American Shelton-a tumpui Carabelli kha set hnihna game li an khelh tlin rualin a khup nain a tibuai a, heti chungin Argentine hian medical timeout zawhah khelh chhunzawm tum ngial bawk mah se Shelton-a tan kawng a hawnsak lo thei ta lo a ni.
Ben Shelton-a tum leh tur Spaniard Roberto Bautista Agut pawhin Briton Cameron Norrie lakah 6-4, 6-3 hnehna a sualchhuak ve bawk.
North America lama ATP Tour kal mekah British number two Norrie hian chhiat a tawk chhunzawm a ni ber a, tun kha a zawn zata match thum a tlawmna ni tawhin, Cincinnati Open second round-ah kum 37 mi veteran Agut chuan 32nd seed Briton hi 6-4 6-3-in a hnawt chhuak.
Norrie hian kumin Wimbledon-ah khan Spaniard world number 53 Roberto Bautista Agut kha set li inbeih hnuah a lo hneh tawh a, first-round hnehna chuan phurna pein All England Club-ah khan quarter-final a thleng hial a, mahse, US leilungah 30C zeta lum hnuaia inkhelh kha a zo lote pawh a ni mahna!
12th seed leh 2019 champion ni bawk Daniil Medvedev chu mipa singles lama tla langsar hmasa niin, Australian world number 85 Adam Walton chuan 6-7 (0-7) 6-4 6-1-in Russian hi a barakhaih a, tun kha a career-a top 50 player a hneh vawi khatna a ni zui ta nghe nghe.
Sixth seed Alex de Minaur pawh Pathianni zana round sang zawk kai zo lo zingah telin, Australian hi 7-6 (8-6) 6-4-in American world number 73 Reilly Opelka chuan a hlap chhuak.
Hmeichhe lam ve thung
Cincinnati-a WTA draw lamah ve thung world number two Coco Gauff chuan Chinese Wang Xinyu laka 6-3 6-2 hnehna changin round sang zawk a kai a; American hian 6-4 2-6 6-2-a Viktoriya Tomova of Bulgaria hnehtu Ukraine nula Dayana Yastremska chu third round-ah a hmachhawn leh ang.
Second seed Gauff hi kum 2023 khan Cincinnati-ah hian a lo champion ve tawh a ni.
Coco Gauff chipui American fourth seed Jessica Pegula pawhin Australia player Kimberly Birrell lakah 6-4 6-3 hnehna changin, Italian seventh seed Jasmine Paolini ve thung chuan inkhel inhnehtawk zetah Maria Sakkari of Greece chu 7-6 (7-2) 7-6 (7-5)-in a paltlang thei hram a ni.