Rel kawng compensation la pek lohten an ram hauh tum

Sairang thlenga rel rawn lut turah rel kawng atana an ram laksak, tun thlenga compensation la dawng ve lote chuan kumin August thla chhunga pek an nih loh chuan an ram chin hi na taka hauha humhalh an tum tih an sawi.
Compensation la dawng lo zinga thenkhat chuan thuthar thehdarhtute an kawm a. Compensation hi mi tam zawk hnenah pek ni tawh mah se, la dawng lo hrim hrim mi 14 leh la pek kim loh mi pakhat an awm tih an sawi a. Compensation an dawn tur chhut chhuah sak tawh hi a vaia belhkhawmin Rs. 14,56, 29,759 a ni.
An compensation tur hi Railways lama an ngaihvenin, Aizawl DC (competent authority for land acquisition – CALA) hnenah an pe tawh niin an lo hrilh a, DC lam hian Railways-in sum an la pe lo niin an lo sawi ve thung a, hetiang hian kum 4 vel chu a kal tawh niin an sawi.
CALA leh Railways aiawhte hian survey/ spot verification hi an mi rawih private firm nen tum 5 vel an rawn nei tawh a. An ram hlutna leh compensation pek tur zat an bituk chu a inmil viau nia an hriat laiin, an ni bik hi tih khawtlai an ni ta reng a, tih khawtlai an nih chhan hi chiang taka hrilhhriat an ni lo tih an sawi a ni.
Guwahati-a NF Railways hotute hnenah pawh an harsatna hi an thlen tawh a, awmzia a nei chuang loa, tunah hian Prime minister leh Railway minister hnenah an thlen leh mek a, hei hian awmzia a nei lo a nih chuan an dikna chanvo humhim a, compensation an dawn hma chu an rama rel kawng kaltlang lo turin an ‘humhalh’ dawn tih an sawi.
August 19 khian Aizawl DC chuan spot verification neih leh turin ruahmanna a siam tih sawiin, teh that hi an huam em em rualin, a kalkual chhung a rei leh dawn a, kum hnih thum emaw a duh leh anga, an ni’n an compensation dawn tur hi an nghahhlelh tawh avangin, a hmaa tum 5 lai neih a lo ni tawh nen, verification a titha dawn a nih rau rau chuan, compensation la tawhte nen a bul ret atanga tan thar leh an phut tih an sawi bawk.
Hetihlai hian Sairang Sihhmui-a rel kawng atana lei dawh innghahnaa in/ram neitu chuan a ram hlutna an chhut sak dan hi cheng nuai 10 chuang a nih laiin, Rs. 3,10,100 chiah pek a la ni a, kum 4 a liam hnu ah pawh a bak hi pek ala ni lo reng tih a sawi a ni.
Tarlan tawh thin angin Bairabi atanga Sairang thleng rel kawng sial hi siam zawh a ni tawh a, enchhin vek tawh niin, Serptember vel hian Prime minister hawn tir tuma inruahman mek a ni.