Kuminah opium man tawh

Opium lakah Mizoram a la himah ngaih a ni a, mahse man tur a awm ve leh zeuh thin. Kuminah pawh excise force te’n an man tawh.
Mizoram Excise & Narcotics (MEN) department-in kuminah opium gram 945 an man tawh a, tlem te tak tak phei zawng a ni. Mahse opium man tawh thu hi ‘news’ a tling ve.
MEN department hotute chuan opium lakah Mizoram a la himah an ngaih thu an sawi a, lo ti ve zeuhte chu hmun thenkhatah an awm tawh thin an ti. Mizorama an man pawh hi damdawi atana hman tur te a ni thin an ti bawk.
1995-ah khan opium hi an lo man tawh a, kg 0.480 an man. Hei hi an man hmasak ber kum a ni a, an man loh vang vang hnuah 2001 khan kg 4.809 an man. 2001 hnuah hian an man ta fo a, tam tham chu a ni ngai lo. 2016-ah a pung ta hluai thung.
2016-ah hian kg 18.478 lai mai an man a, 2016 hi opium man tam ber kum a la ni. Hemi kum hian opium a pung chiam tihna a ni chiah chuang lo a, mi pakhat kut atanga tam thama an man vang a ni. Chu pawh chu ram danga mi tur a lo ni.
Tun hnaiah pawh tlem tlema man tur chu a awm a, 2022-ah kg 0.015 an man a, 2023-ah kg 0.066 an man. 2024-ah an man lo a, kuminah an man leh ta a ni.
MEN department hotute chuan opium hi Manipur leh Myanmar atangin a rawn lut tih an sawi a, mahse opium tawlh lama inhmang tak tak hi an awm rih lova ngaih a nih thu an sawi.
Mizorama opium lo zu vete hi thingtlang hmun thenkhata mi an nih thu an sawi a, meizial zuka lo zu ve mai an nih thu an sawi. Mizorama ruihhlo ti thinte duhzawng a ni lo nia an hriat thu an sawi a, a hlauhawmzia an hriat avangin ruihhlo ti thinte’n tih enah an en lo nia a lan thu an sawi bawk.