Ruihhlo dona’n CM hoin kawng zawh

Nasha Mukt Bharat Abhiyan (Drugs Free India Campaign) Mizoram state level leh Aizawl district level bultumin Aizawla school leh college hrang hrang atanga zirlai 600 chuangin Nilaini khan ruihhlo do kawng an zawh a. Chief minister Lalduhoma’n a telpui. Hmun hnih – Chanmari leh Sikulpuikawn atangin zawh a ni a, Lammualah lutkhawmin rally kharna inkhawm neih a ni. Chanmari atanga kawng zawhte hi chief minister hian a vailiam a, an zingah tel ve nghalin Lammual thleng a kal.
Chief minister chuan Mizoram chu ruihhlo siamna hmunpui bulhnai leh a tawlhrukna kalkawnga awm kan nih vangin ruihhlo hmuh tur a tam a. Nimahse, ruihhlo hian eng thil tha mah min pek loh avangin, kan ban phak lekah awm mah se, kan ti tur a ni lo tih a sawi.
“A ruka zuarte pawh khawtlangin hnawl ngam ila, an phu tawk hremna hmu ngei rawh se. Mipui tang tlang ila, he thil tha lo tak lakah hian kan hnam venghim ang u. Kan thalaiten eng ruihhlo mah hi ti chhin lo ula, tih chhin hi a bawiha luhna kawngka a ni,” a ti. Ruihhlo bawiha tang mekte pawh huaisen taka kalsan ngam turin a fuih bawk.
Ruihhlo tello campaign hi India rama district 372 ah kalpui a ni a. Mizoram district zawng zawngah kalpui a ni. He campaign hian ruihhlo that lohzia zirtir leh a la ti ve lote venhim chu a tum ber a ni a. Nasha Mukt Bharat Abhiyaan kum 5-na denchhenin sawrkar laipui chuan India ram pumah nasa taka campaign hi kalpui a tum a ni.