India-in zalenna a neih champha lawm

India chuan Britain awpna laka zalenna a neih ni champha vawi 79-na, Independence Day an tih chu Zirtawpni khan ram pumah an lawm a. A lawmna pui ber, Delhi-a Red Fort-ah Prime Minister Narendra Modi-a hova hman niin hnam puanzuar a pawt pharh a, thuchah a sawi bawk.
Prime minister chuan Independence Day chu beiseina kûtpui a nih thu sawiin Indian vaibelchhe 140 chuangten ram hlawhtlinna chhuang taka an chanho ni a nih thu a sawi.
Modi-a chuan ram chu chhungrilah inpumkhatna a neih chhunzawm zel a. Kum 75 chhungin danpui chu mipuite tan meichher leh hruaitu a ni tih a sawi bawk.
Prime minister hian kumn hi India danpui awm theih nana a nun hlantu, Dr. Syama Prasad Mookerjee-a piancham kum 125 a lawm kum a ni bawk tih a sawi a. A sorkar chuan Jammu & Kashmir-a Article 370 hman thiatin ‘Ram pakhat, danpui pakhat’ tihhlawhtlinna tura an ke penna a nih thu a sawi.
Tun hnaiah ram chhung hmun hrang hrangah khualrel chhiatna, lei min, sabereka khuangkaih leh a dang tam tak a thleng a. Heng hmunah hian chhanchhuah, chhawmdawl leh tun din lehnaah state leh sorkar laipui chu tha takin an thawkho tih a sawi.
Prime minister hi Red Fort a thlenin Defence Minister Rajnath Singh leh Minister of State for Defence Sanjay Seth ten an lo dawngsawng.
Guard of Honour hlan nghal a ni a, hnam puanzar a pawt pharh nghal a. National flag a pawh pharh rual hian zalenna champha lawmna chungah Indian Air Force (IAF) Mi-17 helicopter pahnihin pangpar an thlak bawk.
Red Fort a thlen hma hian Modi-a hian Rajghat tlawhin Hnam Pa, Mahatma Gandhi-a thlanah hian zahna pangpar a dah a ni.
Thuchah a sawiah Modi-a hian India chu sorkarin mahni kea ding, ram changkang ni turin hma lam panin hna a thawk zel tih a sawi a. Viksit Bharat bulthut chu Aatmanirbhar Bharat niin vawiin hian India chu kil tinah tun lai takin thil a buaipui mek zel tih a sawi.
Thalai scientist, talent nei tha, engineer, professional leh sorkar department-a thawk zawng zawngte chu India siam indo thlawhna khawl siam thei tura tang turin a chah bawk.
Prime minister hian semiconductor siam turin beihpui thlak a ni tih tar langin semiconductor unit paruk awm tawhin pali dang dinna tur pawm a ni tawh tih a sawi a. Kumin kum tawpah hian India siam chip chu zawrh chhuah a nih hman tur thu a sawi.
India-in petrol, diesel leh boruakalhthei lei nan cheng vaibelchhe nual tel a hman thin tihtawp nan ama siam chhuah neih tumin tan a la a, kum 11 liam ta chhungin a hmaa solar energy siam chhuah let 30-a tam siam chhuah a ni tawh tih a sawi.
Prime Minister Modi-a hian Prime Minister Viksit Bharat Rozgar Yojana kalpui tur thu a puang bawk a, hei hi Rs. vaibelchhe nuai khat hmanga thalaite puihna tur a ni a. He scheme hnuaiah hian thalai, mi mal hnuaia hna an hmuh hmasak berah sorkarin Rs. 15,000 a pe dawn a, thalai vaibelchhe 3.5 a puih theih dawn thu a sawi.
Van thengreng lamah pawh India-in hma lam pan zelin Group Captain Shubhanshu Shukla-a’n International Space Station tlawha him taka India-a a haw leh chu lawmawm a tih thu a sawi a. Gaganyaan buaipuiin space station nei tuma hma lak ve mek a ni tih a sawi bawk.
Chhiah lak chungchangah kum riat kal ta chhungin sorkarin GST a tichangtlung tih a sawi a. Hei hian chhiah phurrit a tibo dawn tih a sawi.
Prime minister hian India chuan hmelma tihthaihna laka inven nan Mission Sudarshan Chakra a kalpui dawn tih a sawi a. Kum 10 lo awm leh turah chuan ram himna chu venna chak leh tun lai zawka thuam a nih tawh tur thu a sawi.