Mizoram lamah Assam mi che leh CM Rubber Mission rawn suasam

Mamit district Saikhawthlir rama rubber chinna hmunah Assam Police leh Assam Forest mi an che a, rubber tiak engemawzat an tichhia. The Aizawl Post thudawn danin, Inrinni – August 16 chawhnu dar 2.10 khan Mamit district Zawlnuam RD block huamchhunga Saikhawthlir ram, Diltlang lui zauah Assam lam miten Saikhawthlir mi pahnih rubber huana an rubber chin an rawn suasam sak a, an hnathawhna hmanrua pawh laksakin dar 2.30 velah an kir leh a ni.
Saikhawthlir VCP Lalthuthlungmawia sawi danin, rubber chinna huan rawn suasamtu hi Assam Police 8 leh Forest mi 2 an ni a, an rubber phun sa leh la phun loh polypot-a an dah an tih chhiatsak vek. An suasam sak hi Zoliana rubber tiak phun tawh 240 leh la phun loh bakah Lob-a rubber kung 50 a ni a, an kir leh hnu-ah a bulhnai maia 4th IR Bn-in awmhmun an khuarna chu hriattir mah se, Assam lam mi hi an lo insaseng hman tawh a ni.
VCP sawi danin, kumin August 5 khan Assam lam hian helai hmun hi an rawn tlawh tawh a, thla-te an la a, engmah dang ti loin an kir leh a ni. Tunhma in Assam lam hi an ram huamchungah rawn che ngai vak lo mah se, Mizoram sawrkarin hma a lak hnu ah Assam Police leh Forest hian hnathawh titawp turin an rawn ti tawh a, kawng laitu hnamdang mi kut thlak pawh an nei tih a sawi. Hemi tum hian Mizoram sawrkar lam atangin bawhzuina a awm lo nia sawi a ni.
Hetianga Assam lam an rawn che hi an lungawi lo hle a, Mizoram sawrkarin theihtawp chhuah sak se, pi leh pute hun atanga Mizote luah chin ram nia an lo chhal chu humhalh pui se an duh hle tih Lalthuthlungmawia hian a sawi. Rubber chinna hmun hi Saikhawthlir atangin km.5 vel a ni a, an khua hi tuna 4th IR inbunna atang hian a biru hret a, IR camp hi tlemin hmar lam hawiin tawlh hret se, ramri ven kawngah a huap zo zawkin an ring tih a sawi bawk.
Pathianni tlai khan Mamit district thuneitute, Saikhawthlir, Chuhvel leh Group YMA lam hruaitute chuan thil thlenna hmun hi an tlawh a, leh Assam lam aiawhte nen an inbia a, hotu sang zawkte inbe leh se, hemi hma chuan khawi lam zawk zawk pawhin heng lai chhehvelah hian kut thlak tawh rih loh nise an ti a ni.
Helai hmuna rubber chin hi Chief Minister Rubber Mission hnuaia kalpui a ni a. Chhungkaw 15-in zau khatah rubber an ching a ni.
Tunlai hian Mizoram Rubber Society – MIRSO chuan CM Rubber Mission awareness campaign leh monitoring beihpui neiin Mamit leh Kolasib district khaw hrang hrang an tlawh mek a. ZPM sawrkarin an manifesto-a an ziah angin, CM Rubber Mission chu district pahnih – Mamit leh Kolasib a khaw 24-ah chak taka kalpui niin, rubber chi tha RRIM 600 chu chhungkaw 1000 hnenah a thlawna pe in an huanah an phun tih an sawi.
ZPM sawrkar chuan kum 5 chhungin rubber kung 51,75,000 chu kuthnathawktu chhungkaw 11500 pek tura ruahman niin, kum 4 chhung sawrkarin a enkawl pui zui dawn a ni.