Tomato-ah nuai 42 lalut tawh

Tomato-ah nuai 42 lalut tawh
Khawzawl district-a Chawngtlai khua chuan tunhnai thla thum chhungin tomato quintal 976.81 an thar a, cheng nuai 42 chuang man an hralh tawh.
Chawngtlai Tomato Grower’s Association sawi danin kumin May atanga July chhung khan tomato quintal 976.81 an hralh a, tomato hi grade hnihah thenin, grade ‘A’ quintal 864 leh grade ‘B’ quintal 112 an hralh a, tomato hralhna atang hian cheng nuai 42 chuang an lalut tawh.
Kumina tomato an hralhna rate hi a hniam lai berin kg khat Rs. 40 niin a san lai berin Rs. 80 a ni.
Tun dinhmunah Chawngtlai khuaa tomato ching chhungkua zingah Chawngtlai Tomato Grower’s Association-a tel chhungkaw 103 an awm a, kumin kumtir lama tomato an chinte hralh tur la awm bawk mah se, kumtawp lama thar tur an phun tan leh mek a ni.
Chawngtlai hian kum 2024 khan tomato quintal 4672 an thar a, an tomato thar atang hian cheng nuai 57 an lalut tih sawi a ni. Kumin chhung hian tomato tha taka an thar thei a ni chuan cheng nuai 80 man vel thar chhuah theih an inbeisei a ni.