Mipui bum tumah CM an puh

Mipui bum tumah CM an puh
CBI hnena general consent pek leh pek lohah chief minister Lalduhoma chu mipui bum tumah Congress party chuan a puh.
MPCC thuchhuak chuan, August 15-a India ram zalenna champha vawi 79-na Aizawl Lammual-a neihah chief minister Pu Lalduhoma chuan eiruk do dan kalphung tha zawk sawrkarin a siam tih a sawi thu sawichhawngin, CBI hnenah general consent pe anga a la insawi fo chu mipui bumna dik takah a ngai tih a sawi.
‘ZPM-in 2023 December-a sawrkarna a chan hnu lawk December 28-ah CBI hnenah general consent chu an pe ngei a. Sawrkar hnathawk tu pawh Mizoram sawrkar remtihna la hmasa loin an chhui thei a ni. Nimahse, order hi tidanglamin sawrkar hnathawkte leh public undertaking hnuaia thawk zawng zawng CBI-in a chhui dawn chuan Mizoram sawrkar hnenah phalna lak hmasak zel a ngai tih thupek chu 2024 July 1 khan sawrkar chuan a chhuah leh a. Hei hi general consent niloin partial consent a ni tih Zoram mipuiin lo hre turin kan ngen a ni,’ a ti.
Pu Lalduhoma’n mipui buma ama thuchhuah ngei pawh haider luia dawt chiang taka a sawi duh chu Congress party chuan a dem takzet tih a sawi a. Pu Lalduhoma hian ram zalenna humhim tur leh ramin hma a sawn zel theihnana beitu PM Narendra Modi leh a thawhpuite kut tichak turin Mizo mipui a sawm tih sawi bawkin, ‘Tunhnai lawkah Mizoram aiawh Lok Sabha MP(chu NDA Floor Leaders’ Meeting-ah a tel ngei tih hriat a ni a. Hei mai ni loin Remna Ni-ah NDA/BJP nena inthianthatna chungchang CM hian a lo sawi tawh bawk. BJP-in Kristian-te tan harsatna tam tak min siam chunga BJP hotute kut tichak tura Mizo mipui a sawm ngam kha thil zahthlak a nih bakah kohhran zahlohnaah Congress party chuan a ngai a ni,’ a ti.