Theitui sawrna leh a behbawm…

Mizoramin theitui sawrna kan neih hi kum 30 chuang a lo ni ve ta reng mai. Theitui sawrna ‘Fruit Juice Concentrate Plant’ hi Mizoram sawrkar hnuaia company (Public Sector Undertaking) pakhat MIFCO-in a enkawl niin, Chhingchhip khuaah a awm a, kum 1993 January ni 26-a din kha a ni.
Theitui sawrna kan neih atanga tun hun inkar kum 30 chuang zet chhung khan, Mizoram thar chhuah thei chi hrang hrang heng sapthei, lakhuihthei leh serthlum te sawr a lo ni ve tawh thin a. Thei chingtu kuthnathawktuten an tangkaipui tih pawh hai rual a ni lo. Chutih rual erawh chuan, he theitui sawrna hi a nihna tur angin kan chhawr tangkai thiam lo emaw, kan chhawr tangkai duh lo emaw a tih theih awm e. Mizorama thei chingtute hian he theitui sawrna khawl hi an chawm hneh tawk niin a lang a, company lam hian pawisa neih loh chhuanlamin an tihtur hi an ti thei lo thin niin a lang zawk a. Kan hriat angin, lakhuihthei chingtu chhungkaw 52 pawisa MIFCO-in a batsak pawh nikum khan pek tlak a ni hram a. He theitui sawrna hi a nih dan tur angin chhawr tangkai thiam ila chuan, kuthnathawktute dawmkanna tha tak, state economy chawikanna tha takah a chang thei niin a lang.
Mizoram sawrkar hnuaia PSU-te hian an thawk chhuak tha lo tlangpui a, hloh chunga kal ngar ngar an ni deuh ber awm e. MIFCO pawh hi hetia kalpui reng a nih tho tho chuan, tuna sawrkarin thlai pali-a minimum sopport price a siam ang zulzui hian kuthnathawktute thei tharchhuah heng sapthei, lakhuihthei leh serthlumah te hian investment liantham deuh zawkin kalpui law law thei se, marketing lam hi chu a lungaihthlak loh niin a lang. Abikin Sapthei te hi chu englai pawhin thehthangna a awmin a rinawm.
A nihna takah chuan heng PSU-te hi thawhchhuah (hlep) nei tur leh mipui hamthatna (public welfare) siamsak thei tura din a ni a. Sawrkar laipui hnuaia PSU lian zual heng ONGC te, BHEL, SAIL etc te hi kan en chuan, din an nih chhan (goals) hi an thleng (commercially successful) tha hle kan ti thei ang.
Chuvangin, Mizoram sawrkar hnuaia PSU te hi tunhmain sum thuni-nu tih hlawh lo ni tawh thin mah se, kalphung thar hnuaiah hi chuan sum thawkchhuaktu ni tura cheibawl a, sawrkar leh mipui hamthatna tam zawk pe thei tur khawpa thuam that ni thei se, ‘sawrkar kal tawh ten an tih theih loh ti theitu’ nihna title invuah thei ngei turin sawrkar hi han tang sauh sauh teh se.