Ni hnih chhungin chetsualnaah 3 thi

Pathianni leh Thawhtanni khan hmun thuma chetsualna thlengah mi pathum an thi.
August 17 chawhnu dar 2.30 vel khan taxi MZ 01 N 2030 chu Rangvamual atanga Hunthar Veng lam pana a tlan laiin thingkung a su a, a khalhtu David Lalsangzuala, Khuangleng Champhai district, tuna Laipuitlangtlang-a khawsa nia sawi chu a hmunah a thi, chuanpui pakhat a nei a, a ni hi chuan hliam na a tuar lo nia sawi a ni.
August 17 tlai dar 4.30 vel khan Serchhip Entlanga Chhunkhah (tuikhuah) ah HD Malsawmpuia (15) s/o HD Lalhmachhuana (L), Serchhip AOC Veng chu a tlahlum. Thudawn danin HD Malsawmpuia hi a thiante nen tuikhuahah hian an kal a, a thian tuithiamte chu an cheng a, a ni hi tuichen thiam lo a ni chungin a lut ve a, a chesual ta mai nia sawi a ni. Chhan tumin an bei nasa a, an chhan hman ta lo a ni. HD Malsawmpuia hi fapa mal a ni a, nikum khan a pa a thi a ni.
Pathianni zana HD Malsawmpuia lumennaa kal B Vanlaldika (23) s/o Vanlalruati, Serchhip P&E Veng chu August 18 zing khan an in bulah thia hmuh a ni a, a bike-in a lo delh a ni. Thudawn danin, B Vanlaldika hi mitthi lumenna atanga a haw hnu ah a bike dah tha tur chu chesualin bike hian a delh ta nia rin a ni a, a hrawk bawk zawnah a lo delh bet a ni. Zing dar 5.30 velah thenawmten a bike dahna thin bulah hian thiin an hmu ta mai a ni.