New York City club-a inkahnaah mi pali thi

New York City club-a inkahnaah mi pali thi
New York City, US-a Brooklyn-a club-a pungkhawmah inkahna thlengah mi pathum vel an thi a, mi dang pariatin hliam an tuar bawk.
Chhuitute chuan mi pali vel nia hriatten silai an hmet puak a, Pathianni zing dar 03:30 (India-a chawhnu dar 01:00) velah Crown Heights venga Taste of the City Lounge-a thleng niin an sawi a, ‘inhnial buaina’ chhuakin an inkap ta niin New York Police Department Commissioner Jessica Tisch chuan thuthar lakhawmtute hnenah a sawi.
“New York khawpuiah hian inkahna rawng tak a thleng a ni,” tiin Tisch-i chuan a sawi a. Officer-ten silaimu ruak 36 vel an hmu a, a bul hnai kawtthlerah silai an hmu bawk tih a sawi.
Inkahna hliam tuar, mipa pariat leh hmeichhia pathum chu damdawi inah enkawl mek an ni tih a sawi a, nunna atana hlauhawm khawp an tuar lo niin a sawi bawk.
New York City-ah hian silai nena pawikhawihna a thlen tlem ber kum a nih mek laiin hetiang thil hi a thleng a. “Kuminah hian silaia inbeihna a thleng tlem hle a, thla sarih liam ta chhung kha New York-a thla sarih chhunga a thlen tlem ber tum a ni,” tiin Tisch-i chuan a sawi a. “Hetiang a ni hi Pathian hnenah pawh lawm thu ka sawi a, tukinah thil rapthlak tak a thleng a, kan chhui zui mek a, a bul atangin kan hai chhuak vek ang,” a ti bawk.
July thlaah khan Manhattan-a National Football League (NFL) pisa luhchilh tum mipa pakhatin mi pali kap hlumin amah a inthat bawk a. New York City Mayor Eric Adams-a chuan hetianga NFL hmun a beih duh chhan hi an inkhelhnaah hliam tuara a thluak a khawih tel vang niin a sawi nghe nghe.