Morgan Wallen “I’m the Problem” kar 11 a No.1 ta

Morgan Wallen “I’m the Problem” kar 11 a No.1 ta
Morgan Wallen album “I’m the Problem” chu Billboard 200 (US albums) chart-ah a No.1 a, he chart-a kar 11 a No.1-na a ni ta. Hetihrual hian Gunna, mgk, Jonas Brothers leh BABYMETAL te pawh chart top 10-ah an debut.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album hla a mala hralhna atanga album tlukpui te belhkhawm thin a ni.
“I’m the Problem” hi kar khat chhungin US-ah 1,26,000 an hralh leh a, chung zinga 1,21,000 chu streaming atanga album tlukpui (on-demand official stream maktaduai 159.73) niin, album tak tak hralh chu 4,000 a ni a, album-a hla a mala hralhna atangin 1,000 a tling thei bawk.
KPop Demon Hunters soundtrack chu 1,04,000 hralh lehin No.2-ah bawk a la awm a, he album hralh hi kar kalta aiin 4%-in a pung a, kar riat kaltaa an tlangzarh atangin kartin album hralh hi a pung zawngin a la kal char char a ni.
Gunna album thar ‘The Last Wun’ chu 80,000 hralhin No.3-ah a debut a, 79,000 chu streaming (on-demand official stream maktaduai 104.49) niin, album tak tak hral chu 1000 a ni a, hal mal hralhna chu chhiar tham a ni lo. Gunna hian top 10 album pasarih a nei tling ta a ni.
mgk album thar ‘lost americana’ chu 63,000 hralhin No.4-ah a debut a, a top 10 album pasarihna a ni ve chiah bawk. He album hralhna hi 40,500 chu album tak tak hralhna niin, streaming atangin 22,000 (on-demand official stream maktaduai 28.63) niin, hla mal hralhna atangin 500 a tling thei bawk.
Alex Warren “You’ll Be Alright, Kid” chu 42,000 hralh lehin No.6 atangin No.5-ah a kai thar leh ta bawk.
Jonas Brothers ‘Greetings From Your Hometown’ chu 39,000 hralhin No.6-ah a debut a, an top 10 album pariatna a ni a, 26,000 chu album tak tak hralhna niin, streaming atangin 13,000 a tling thei bawk.
Justin Bieber ‘SWAG’ chu 38,000 hralh lehin No.5 atangin No.7-ah a tawlh a, chart No.1 hlui Morgan Wallen ‘One Thing at a Time’ chu 38,000 tling lo deuh hralh lehin No.7 atangin No.8-ah a tawlh ta bawk.
Japanese hmeichhe group BABYMETAL album ‘METAL FORTH’ chu 36,000 hralhin No.9-ah a debut a, he chart top 10 a an lan vawi khatna a ni. ‘METAL FORTH’ 33,500 chu album tak tak hralhna niin, streaming atangin 2,500 a tling thei bawk.
Chart top 10 khartu chu chart No.1 hlui SZA ‘SOS’ niin, 35,000 hralh lehin No.8 atangin No.10-ah a tawlh ta a, he album hi a zawn lovin chart top 10-ah kar 100 a lang tling ta a, hmeiche zaithiam zinga hetiang tithei hmasa ber a ni.