Sawrkar sikulah exam zawhna inang
Mizoram sawrkar hnuaia awm school-ten standard inang tlanga exam zawhna an chhan theihnan zawhna inang siam a ni dawn a. A enchhinna atan academic session kal mekah pawl 5 leh pawl 8 tan third term-ah hman a ni dawn.Nilaini khan School Education minister Dr Vanlalthlana hoin academic session kal meka common question exam kalpui dan tur an rel a. State sawrkar enkawl leh sawrkar puihna dawng (deficit, adhoc, lumpsum adt.) school-ah standardized assessment hmanga exam buatsaih tum niin, autonomous district council hnuaia school erawh a huam lo.
Common question exam hi a hming atan ‘Standardized Assessment for Elementary Schools (SAfES) vuah a ni a. Mizorama elementary school-ten standard inang tlanga zawhna leh chhanna, NCF-FS leh NCF-SE in a sawite mumal taka an hmelhriatna atana duan a ni.
SAfES exam-ah hian pawl 5 leh pawl 8 zirlaiten final exam atan subject tinah zawhna inang (common question) an chhang anga, zawhna hi SCERT-in term tin atana portion a siam atangin an textbook-a third term portion tur bik atangin a siam ang.
He thil hi NEP 2020-in academic structure a ruahman dan zawmna atan, school zawng zawngin academic authority – SCERT-in zirlaibu zir tur a siam chu an zir ngei em tih hriatna atan, zawhna quality tha leh pattern inang an chhan tlan theihnan leh zirtirtuten lesson plan an siamsa mumal takin an kalpui em tih hriatchianna atantea tih a ni.
2025- 2026 academic session hi pilot project-a kalpui tur a nih avangin 3rd term-ah tan a ni anga, session tharah erawh term tina exam a ni dawn a, he exam-in a huam tur chin school leh pawl zat chu ngaihtuah that tur a ni.