Hulhliap chhuak ho zingah ruihhloa la fihlim mi 200 vel

Hulhliap chhuak ho zingah
ruihhloa la fihlim mi 200 vel
Sawrkar, kohhran leh tlawmngai pawl-in ruihhlo ti ho chhanchhuahna atana a bik taka a ruahman – Hulhliap Short Stay Center tum hnih an siam tawhah mi 1500 chuang an lut a, a tawp thleng awm thei mi 370 chuang hret an ni. Heng zinga mi 200 vel chuan tun thlengin ruihhlo an la khawih rih lo nia ngaih a ni.
Hulhliap Short Stay Center Core Committee chu an chairman, Mizoram Youth Commission chairman Malsawmzuala Ralte hoin Nilaini khan an thukhawm a. Hulhliap SSC program vawihnih neih tawh thlirletin, Task Group hrang hrangin report an pe.
Hulhliap thawhkhatnaah mi sang chuang an lut a, a tawp thleng thei mi 116 an awm. An chhuah hnuah volunteer 43-in follow-up, psychosocial counselling neiin, home visit vawi 4 an nei tawh a, heta an hmuh danin mi 46 chuan ruihhlo an la fihlim san a ni.
A thawh hnihnaah mi 500 chuang an lut a, mi 263 awn tluanin an ni pawh hi volunteer 53-in an umzui a. Home visit vawikhat nei tawhin mi 162 chuan ruihhlo an la fihlim san.
Hulhliap atanga camp chhuak tan hian follow-up bakah skill training ruahman mek a ni a. Mistiri training mi 50 tan, plumbing mi 30 tan, aluminium fabrication mi 30 tan, assistant electrician mi 30 tan, basic food processing course (chips, jam, pickle making, juice beverage & fruits wine making, powder & ganule making, food preservation, food safety procedures) mi 25 tan skill training hi kumin September 1 atanga neih tan theih beisei a ni.
Hulhliap camping tum hnih neih tawha a tawp thlenga awm hi mi 379 an ni a. Batch hnih atan hian Task Group hrang hrang sum hman tur Rs. 81,93,852 pek tawh a ni. Batch 3-na hi August 25-a tan tur niin, Hulhliap SSC program hi thlatin, 2026 March thleng chhunzawm tum phawt a ni.