CM hmalakna in BSF la dawn – ZPM Thalai

CM hmalakna in BSF la dawn
– ZPM Thalai
Chief minister Lalduhoma’n Union Home minister Amit Shah a ngen angin, special recruitment hmanga Mizo thalai tan Mizorama schedule tribe khawsa nghette chanpual bik tur BSF constable general duty post – mipa 255, hmeichhia 45, a vaiin 300 lak a ni tur chu lawmawm an tih thu ZPM Thalai chuan an sawi.
ZPM Thalai Hqrs chuan, Ministry of Home Affairs (MHA) in kum 2023-a central armed police force constable lak dan, revised scheme a siamah hmarchhak state hrang hrangin reserved vacancies an neih theih dan a sawi a, quota hnawhkhah loh hi special recruitment hmanga hnawhkhah theih a ni a, hei hi thiam takin CM hian hmang tangkaiin, Mizoram quota la hnawhkhah loh hnawhkhat turin Union Home minister a ngen a, a hmalakna a hlawhtling ta chu a lawmawm tih a sawi a ni.
Hei bakah hian ZPM sawrkar chuan Mizorama thalaite hmakhua ngaiin, thalaite nun tichhetu, state leh international ramri atanga sawrkar phal loh thil lo lut thin doletna atan MHA lama hma a lakna kalzelah Mizo Territorial Army (MTA) din a ni dawn tih sawiin, MTA hi Mizoram leilungfate chanpual tur a ni tih a sawi.
‘Mizoram thalai leh leilungfate tana ngaihtuahna sengtu chief minister kan nei hi thlamuanthlak kan ti a, leilungfate tana hna a sawi chhuah hi Mizo thalaiten hmang tangkai turin kan ngen a ni,’ thuchhuah hian a ti.