Nutling thattu nia insawi inpuang

Nutling thattu nia insawi inpuang
August 19 chhuna Maubawk Veng Aizawla nutling kum 80 mi tualthihna chungchangah pawikhawihtu nia insawi chu police hmaah a inpuang a. Amah hi Central Jail-a dah nghal a ni.
The Aizawl Post thudawn danin, police hian mi 7 vel thu zawhfiah turin an la hman a, rinhleh kai zual phei chu thu zawhfiah tura la kawl phalsak turin court hnenah an dil mek a ni. Hetihlai hian tualthi Runliani bag ah lai ni ngeia hriat chu an in bul maia thingkungah hmuhchhuah a ni a, hemi atang hian police hian chhuizuiin, rinhlelh pakhat Vanlalmuanchhana (21) chu August 23 (Inrinni) chawhnu khan an lak belh a ni.
Police-in an dawpnaah Vanlalmuanchhana hian Runliani chunga pawikhawihtu hi amah niin a inpuang a, a bag laksakah hian cheng sanghnih vel a awm a, a lo la hmang zo lo nghe nghe nia sawi a ni. Bag hi an kawmthlangah a paih a, thingkungah tangin hei hi amah an chhuichhuahna a ni ta a, tualthahna hmuna hniak awm atangin a chappal bun nen pawh a hmehbelh theih tih sawi a ni.
Hetianga a inpuan avang hian Inrinni zan dar 9.00 vel khan Central Jail-ah dahluh nghal a ni a. Tualthattu inpuan thu hi police pawhin an tichhuak zui a ni.
Tualthattu nia insawi Vanlalmuanchhana hian thurualpui a neih awm tun thlengin hriat a ni loa, tualthihna thlenna hmun atanga hnaitea awm an ni a, a nu hoa khawsa an ni.
Maubawk Local Council, YMA, MHIP leh MUP chuan thuchhuah intawm siamin, tualthattu chhuichhuah a ni chu an lawm hle a. Theihtawp chhuahtu Mizoram Police thawhrimnaah khawtlangin lawmthu a sawi tih sawiin, tualthattu nia insawi Vanlalmuanchhana chu a phu tawk ang ngei na taka hrem nise, an duh a; amah hi Maubawk Veng chhungah a awm zui an remti tawh lo tih an sawi a ni.
Hetihlai hian tualthattu inpuan hma Inrinni vek khan Seventh Day Adventist Maubawk Women’s Ministries chuan, Maubawk Veng kawnah upate chunga hleilen duh lohna lantira pungkhawmin an aurual a ni.