Hnama chian… Hnama thanhawrh…
Tun hnai khan party hruaitu pakhat chuan, hnama kan chian a, kan hnam hmangaihna thinlung, nationalism-a kan thanharh phawt chuan kan hnamin hma a sawn zel dawn tiin a sawi a. Ram hruaitu pakhat pawhin, ram leh hnam thanna kawnga mawhphurtu lian zingah zirlaite an tel, tiin a sawi bawk a.
Kan ram hruaitute leh politician-te hian nationalism an sawi hian, hnama chian… hnama thanharh… tih hi an sawi teh chawk a. Kan ramin hma a sawn chak loh dan han ngaihtuah hi chuan, kan ram hruaitute leh kan politician-te hi hnamah an chiang lovin, hnamah an la thangharh lo hle, tihna a nih hmel.
Ram hruaitute leh politician-te hi a practical-a ram kaihhruai hna thawktute an nih avangin kan ramin hma a sawn leh sawn lohah mawh an phur sang hle a. Chutiang mawhphurhna la rawn chelh thei dinhmuna ding mek tuna kan thalaite, kan zirlaite entawn tur hi tuna kan ram hruaitute leh kan politician-te hian an hnutchhiah tha reng em? An hnutchhiah tha lo a nih chuan, hnamah an chiang bik lo a, hnamah an thangharh bik lo tihna a ni ang. Kan ramin hma a sawn chak loh dan te, kan ram economy dinhmun la hniam dante han en hi chuan, hnama chiang lo, hnama thangharh lote chu, fuihna thu tha tinreng sawi thin ram hruaitute leh politician-te hi an lo ni reng zawk mai em? Chakai nufa kal dan tur inzirtir te hi kan ang thei mai ang em?
Harhna tur hi kan ngah hle niin a lang. Tuna kan Mizo thalai mi lar (celebrities kan ti ve mai ang chu) te zingah hian, hnam dang hming mak pui pui invuah hi an intihhmuh mek niin a lang a. Hengho hi hnama chiang lo pakhat chu an ni thei awm e. Sumdawng leh dawrkai zingah pawh, hnamdang hnena mahni hnam hming hawhtir duh kan awm a, chu pawh chu hnama chiang lo, hnam phatsantu an ni a. Sawrkar hnathawk zingah pawh, hnamdang contractor leh supplier lian etc. te nena ram leh hnam enkawlna tur sum khawih chingpen duh an tam a, chu pawh hnama chiang lo. Ram hruaitu/politican-te zingah pawh mahni ram leh hnam enkawlna tur sum ngei ngei pawh chheprelh duh an awm thin niin a lang a, chung mite pawh chu hnam chiang lo, hnama thangharh lo, an ni bawk. Mipui zingah pawh ram leh hnam hmasawnna hna thawhna tur sum pawhpenpui tur zawnga vak vak an awm bawk, chung mite pawh chu hnama chiang lo. Lang thei lama khawtlanga thahnemngai awm taka lang, a ruka ruihhloa sumdawngte pawh, hnama chiang lo, hnama thangharh lo, hnam hmelma an ni. A tam mai….
Naupang thang lian mek, thalai, zirlaite etc. environment hi a thianghlim lo hle mai a, entawn tur tha hi kan chhawp chhuak tlem hle niin a lang a. Chutih laiin anni chu thianghlim turin kan beisei a, mawhphur turin kan dah lawi bawk si a. Lui hnar lam hi fim phawt se, a mawng lam chu a fim thla zel mai dawn a. Chakai nufa kal dan inzirtir an sawi ang mai ni lo hram turin i inbuatsaih sauh sauh zawk ang u khai…