Bihar inthlanah NDA-in bial an inchan sem fel hnai

Bihar inthlanah NDA-in bial an inchan sem fel hnai
October-November vela Bihar assembly inthlan lo awm tur a hnai zel a, rorel lai, National Democratic Alliance (NDA)-a JDU leh BJP pawhin an dinna tur bial an insem fel hnai niin Pathianni khan sawi a ni.
Eptu tangrual, Mahagathbandhan-a RJD leh Congress pawhin Congress hruaitu, Rahul Gandhi leh RJD hruaitu, Tejashwi Yadav-a hovin ‘Voter Adhikar Yatra’ tia hming an vuahin campaign beihpui an thlak tan tawh.
NDA-a tel party-ten bial an inchan sem dan tur hi a felfai tluk a ni tawh a. A lian pahnih, BJP leh Chief Minister Nitish Kumar-a kaihhruai Janata Dal (United) chuan bial 2443 awmah bial 100-105 ve ve an chang dawn niin The Indian Express chanchinbu chuan a tar lang.
Kum 2020 khan JDU hian bial 115 chuhin bial 43-ah hnehna an chang a, BJP hian bial 110 chuhin bioal 74 an la a. Hnehna an channa zat hi inthlau hle mah se Kumar-a hi hruaitu berah an neih zui ta tho va. Tum tumah hian JDU hian bial 100 chuh tlin leh tho loh chu an duh bik lo nia sawi a awm.
Inthlan hmasaka mal tan, Chirag Paswan-a chu tunah hian Narendra Modi-a kaihhruai sorkarah union minister a ni mek a. A kaihhruai, Lok Janshakti Party (Ram Vilas) chu NDA-ah a tel tawh a, bial 40-ah tal din phut mah se a duh ang zet hi an chang dawn lo nia sawi a ni.
Party pathum bakah hian party tenau thawhpui dang pawh an la nei nual a. Heng zingah hian union minister ni mek, chief minister hlui, Jitan Ram Manjhi-a kaihhruai Hindustani Awam Morcha (Secular) leh Upendra Kushwaha-a kaihhruai Rashtriya Lok Morcha an la awm a. Mukesh Sahani-a kaihhruai, Vikassheel Insaan Party (VIP) chu eptu tangrualah la tel mah se an tan lam an thlak mai thei nia sawi a awm.
Paswan-a hian inthlan hnuhnung berah khan bial 115 zet chuh mah se bial khatah chauh MLA an nei phak a, an MLA hian JDU a zawm zui nghe nghe a. Tun tumah hian Modi-a leh BJP an thlawp tak avang hian JDU dinna tur bial 30 chuang zetin an la hek thei dawn nia ngaih a ni.
NDA hruaitu hlun tak pakhat chuan JDU-in BJP aiin bial an chang tlem dawn em tih chu zawhna ngai lo a nih thu sawiin a hnuhnung bera chet dan thlir chungin, LJP an tel ve tak bawk avangin JDU chanpual a hek dawn niin a sawi.
NDA hruaitu hian an campaign hunah chuan Kumar-a chu chief minister ni leh turin an zuar dawn tih a sawi lawk bawk.