PE 31 lak dan H&FW-in sawifiah
PE 31 lak dan H&FW-in sawifiah
Tunhnaia centrally sponsored scheme hnuaia thawk ve tho provisional employee 31 dah ngheh an nih chungchang chu Health & Family Welfare department-in a sawifiah.
Health & FW department thuchhuak chuan, centrally sponsored scheme (CSS) hrang hrang a kalpuiah kum 2010 atanga a kalpui tawh pakhat “Implementation of Family Welfare Programme” a a component hman pakhat chu – infrastructure maintenance (Sub Centre) a ni a. He scheme hi sawrkar laipui Ministry of Health & FW hnuaia Centrally Sponsored Plan Scheme ami a ni tih a sawi.
IM Scheme-ah hian department chuan kum 2013 khan health worker 50 lak phalna a dil a. MR skilled-II basis-a lak phalsak niin, an engagement card-ah ‘co-terminus with the scheme’ ziahlan kher tur tih a nih thu a sawi.
‘Sawrkar dan ang thlapin health worker muster roll employees 50 lakna tur advertisement chhuah a ni a. Written exam leh DPC hmaah personal interview an paltlang hnuah health worker turin mi 50 chu appointment pek an ni a. Tun dinhmunah thi leh bang an awm avangin mi 32-in an hna hi an la thawk a, scheme borne an nih avangin Provisional Employees Regularization Scheme 2020 dan hmanga tihngheh theih an ni lo,’ a ti.
Hetihlai hian kum 2024 khan sawrkar chuan CSS hnuaia thawkte dahnghehna tur ‘The Government of Mizoram Regularization of CSS Employees Scheme 2024’ a siam tih a sawi a ni.
CSS Regularization Scheme 2024-in ‘eligibility criteri’a a sawi leh DP&AR-in check list a siamte zawm leh nei vek an nih avangin IM scheme hnuaia health worker-te hi dahngheh (regularised) an nih theihnan sawrkarah thlen a ni a. Mi 32 zinga pakhat hian CSS regularization check-list documents a neih kim loh avangin regularize theih a ni loa, MR/PE 31 regularization proposal chu DP&AR (ARW) in ngun taka an lo endik hnua pawmpui an ni tih sawiin, Finance department pawhin approval a pe a. Kumin June 15-a Departmental Promotion Committee (DPC) thukhawm chuan heng mi 31 hi sawrkar hnathawk nghet turin a recommend leh tih a sawi a ni.
Fimkhur thu ah – Implementation of Health & Family Welfare Programme Scheme atana central sum hmuh hi CSS-a chhiar tur a nih leh nih loh Finance department-ah zawh a ni a. Finance department chuan CSS-a chiar tiin a rawn tichiang a. Law & Judicial department thurawn lak a ni bawk a. An ni pawh hian an zirchiannaah dan loa thil tih a awm loh thu leh DPC thu ang chu kaltlangpui turin thurawn a pe tih a sawi a ni.
‘Sawrkar dan leh dun engkim zawh famkim a, dan ang thlapa CSS Regularization Scheme 2024 hnuaia regularize theih health worker 31 kan nei hi department chuan lawmawm a ti hle a. Health worker 31 hnenah an chanvo dik tak, regularization a pek hian sawrkar chuan mipui leh a hnathawkte lakah a tih tur diktak a ti a ni,’ a ti.