‘Ruling’ leh ‘ling’ lo….

Vanduaithlak taka Dampa bialtu MLA, July ni 21, 2025-a a boral tak avangin, Mizoram chu bye election neih hmabakin kan awm mek a. Tuna rorel lai ZPM party chuan bye election-a an official candidate tur chu nimin khan an puang a; Dampa bialtu MLA boral atanga a thla khatnaah chiah a ni.
Bye-election hi dan ang chuan thla ruk chhunga tihfel tur tih a ni a, tunah hian thla nga(5) a la awm a, election thuneitu lamin bye election chungchangah thu leh hla an la nei lo a; chutih laiin ruling party lamin official candidate an puan tawh chuan, bye election neih hun hi hla vak tawh lo turah a ngaih theih awm e.
Hetiang bye election hi Mizoram hian a lo hmachhawn fo tawh a, hetiang huna ruling party lamin bye election neihna tur bial mipuite hnena an hmanraw leklam pakhat chu ‘Ruling’ bial nih a hlut bikna te, opposition bial aia hamthatna a awm theih zawk dan te, bialin hmasawnna tluantling a neih theih nana ‘ruling bial’ ngei nih a pawimawhzia te a ni thin.
Hetiang hi election campaign auhlaa kan hmang thin a nih chuan, hleih nei takin, ruling bial leh opposition bial hi kan lo enkawl thin tihna a ni awm e. Hei hi thil tha lo tak mai a ni. Hetianga kan kal hian, a tuartu chu MLA bial pakhat kha a ni mai lo va, state pumin a tuar tihna zawk a ni. Bial pakhat hmasawnna tura kan thawh laia bial dang hmasawnna ngaihthah lui leh hnungchhawn lui chunga ro kan rel a nih chuan, kan ram(state) hian hmasawnna tluantling hi a nei thei ngai dawn lo tihna a ni. Hetianga ruling bial invulh bikna boruak hian, tunhmaa politics tuinu kan tih ‘utawk pawh in-candidate se, kan party hminga ding a nih chuan ka vote tho tho’ tih hun lai (Era)-ah khan min hruai lut leh dawn tihna a ni. Khatiang politics tuinuin ram inrelbawlna a tihthuanawp theih dan pawh kan tawnhriat (experienced) vek hnu a nih kha.
Ruling bial a ni emaw, opposition bial a ni emaw, eng bial pawh, Mizoram chhunga awm vek a ni a, bial tihhmasawn ngai ngawih ngawih pawh ‘ruling bial’ an nih loh vanga ngaihthah deuh tur anga inngaih theihna mipui rilrua tuh tum hi Mizoram hmasawnna daltu tur a ni ngei ang.