Mizorama kutdawh phal loh na dan siamna tur bill pawm
Mizorama kutdawh phal loh
na dan siamna tur bill pawm
Assembly Session neih mekah Mizorama kutdawh phal lohna dan siamna tur bill chu House-in a pawm.
Nilaini khan House-ah hian Social Welfare minister Lalrinpui chuan “The Mizoram Prohibition of Beggary Bill 2025” a pulut a, sawiho zui niin, member 13-in an sawi a, hemi hnu hian speaker-in vote la in pawm a ni. Eptu member-te chuan tul an tih loh bakah zirchian leh phawt an duh thu sawiin, an pawmpui ve lo.
Bill puluttu Social Welfare minister chuan an zirchiannaah tunah hian Aizawlah kutdawh 30 chuang hmuh tur an awm a. Mizo diktak ni lo leh Mizoram mi leh sa ni lo an awm nual nia a lan thu sawiin, kutdawh mekte hi a tam zawk chu khawtlang leh kohhran hriatpui nise, kut dawh loa chhawmdawl theih nia an hriat thu a sawi.
“Tlangkamah chuan kutdawh hi a hlawk an tih hrim hrim avanga kutdawh ta an awm nual niin a lang,” a ti.
India ram state hrang hrangin kutdawh khapna dan an nei deuh vek a, Chutih laiin Mizoram-in hemi lam kaihhnawih dan hranpa emaw dan adopt emaw a la nei loa, dan siam a nih theihnan bill hi putluh a ni ta tih a sawi a ni.
Dan hi siam a nih chuan kutdawhte enkawl leh chhawmdawl zuitu tur state leh local level-ah Relief Board a awm anga, hetah hian a tul angin NGO leh kohhran chu member-a dah theih an ni dawn. Enkawltu nei lo/ haw na tur nei lo an nih chuan anmahni dahna tur ‘centre’ siamah an awm anga, chhawmdawl dan tur duan a ni. Kutdawh lui zel man theihna leh sumfai chawi theihna bakah mi kut dawh luihtirtute thlengin hrem theih an ni dawn tih minister hian a sawi.
“Mizo khawtlang nunah chuan khawtlang leh kohhranin mi chhumchhiate kan chhawmdawl tel tel avangin Mizoram hi kan zavaia kan tanho chuan kutdawh awm lohna – ‘Beggar free State’ ah kan siam thei a, hei hi tih ngei pawh kan tum a ni,” Lalrinpuii hian a ti.
Leader of opposition Lalchhandama Ralte chuan he dan duan tumah hian Mizo khawtlang nuna pawimawh tak, mi tanpuina atana khawlai/ puipunna leh electronic media kaltlanga zai leh thildang hmanga tanpuina bawm dawh, charity event huaihawt pawh khap tel a ni chu tha lo a tih thu a sawi a. Mizoram-a mitdel leh kut tual leichham avanga kut dawh thlengin dan hian a huam dawn si a, vanduaina avanga kut dawh lo thei lo an awm thei a, kutdawh khap tum chu thil tha ni awm taka lang, mahse tha si lo a ni, tiin a sawi.
House leader Lalduhoma chuan tunlaiah hnathawk peih lo, dawt sawia lemchang thin an awm tih MLA-te phei chu a hrechiang bertu an ni tih a sawi a. Tuna dan neih chu ala hun lo niin ngai mah ila, khua kan tlai ang tih a hlauhawm tih a sawi.
“He bill-in a tum ber chu, kutdawh awm lohna ram ni ila, tih a ni. Dawh lo thei lo an awm a, chu chu he bill hian a hre lutuk. Chung mite chu kawtchhuaha ei zawng loa, kut dawh loa kan siam theih dan a awmin kan hria a. Dawh lo thei lote Mizo danin mahni veng theuhah hetiang mi hi chu kan hre thei mai. Vawiin thlengin khawtlang leh kohhranin kan dawm kang a, kan pui mai thin. Hetiang mi hi kut dawh lo turin siam teh ang tih chu he bill-in a tum a ni,” a ti.
Bill pass pui tura House a dilnaah Social Welfare minister chuan, member-te hriatchian duh leh hlauhthawn an neih a sawifiah a. Kutdawh ngai khawpa harsate chu sawrkar laipui ruahman SMILE (Support for Marginalized
Individuals for Livelihood and Enterprise) hmangin an eizawnna tur he dan hmang hian an siam dawn tih a sawi a. Charity event pawh phal loh, tih chu, state leh local relief body-ten an phalsak theihna dan tur bilh tel tho a ni tih a sawi a ni.