‘Khawngaih takin’ ni lovin ‘Order’ zawk …

Ni hnih awh Assembly Session chu nimin khan zawhfel a lo ni leh ta a. Tun tum session-ah hian zawhna chhan hman loh 19 a awm a, ziaka chhan chi pasarih leh tawngkaa chhan chi 12 a ni. Session neih dawn hian zawhna neitu MLA ten session tan hma ni 15 hma lamah zawhna an theh lut thin.
Session tan ni August ni 27 khan Sunna hun hman zawha zawhna leh chhanna hun tan hmain Speaker-in thuhma a nei a. Zawhna chhan chungchangah, Session hmasa lamah, tan la thar leh tura official-te tumkhat mai pawh ni lo, a lo ngen tawh thin thu a sawi chhuak a. Speaker hian, “Nizan thleng khan kan la buai khawp mai…” a ti. “Khawngaihin kan official-te he lamah hian tan i la thar leh teh ang u…” tiin a ngen leh nghal nghe nghe a ni.
Hemi chungchangah hian Leader of Opposition Lalchhandama Ralte pawhin thil thleng chu zahthlak a tih thu leh a lak serious thu a sawi a. Speaker-in House kaltlanga official-te pawh a ngen zin tawh thu sawiin, “… Nizanah vawiina kan rel tur list of business pawh zan dar 12-ah pawh kan la hmu thei lo… He House hi a tibawrhbang … tu department nge muang tih sawi lan tha ka ti… kan House Leader pawhin remchang hmasaah a zilhhau a tul….. Zan dar 12-ah pawh member-ten vawiina kan programme tur pawh kan la hmuh theih lohna chhan kha, Assembly house-a thawkte ni lovin sawrkar department lam an ni…” tia sawiin Speaker chu House aiawha engemaw ‘ti’ tura a duh thu a sawi bawk a ni.
Hemi chungchangah hian Lawngtlai W MLA C. Ngunlianchunga pawh a rawn ter chhuak at a. Speaker chu polite taka dawhkan atanga ‘khawngaih takin’ ti lova ‘Order’ zawk tura a duh thu a rawn auchhuahpui a… “He sawrkar hi a inthlahdah lutuk…” a ti bawk.
Sawi leh sawi hnu, Mizoram sawrkar hnuaia department thenkhat inenfiah ngai zual deuh bik hi chu an awm chiang mai. Hei hi RTI zawhna an chhan dan atang pawh hian a lang. Department thiltih reng reng, record fel fai tak nei vek tura beisei an ni a, chu chu computer-ah vawng thain, mamawh huna han ‘click’ zeuha lakchhuah mai theih tura vawn fel tur a ni. Tuna MLA-te zawhna chhan hman lohte hi eng vanga chhang hman lo nge an nih tih hi, a department hming tarlan satliah mai ni lo, chhui fiah a, a chhan leh a vang azira action lak hialna tham niin a lang. Session tan hma ni 10 vel chhung pawha Mizoram rorelna in sang ber mamawh phuhru thei lo khawpa efficient thei lo department chuan mipui an zah lo hle tihna pawh a ni thei nghal awm e. Hetiang thil hi thleng nawn leh tawh lo se a duhawm takzet a ni.