UD&PA-in PHE kutah hna hlan

UD&PA-in PHE kutah hna hlan
PHE minister Prof. Lalnilawma hoin PHED leh UD&PA hotuten UD&PA department hnuaia hnathawh, Aizawl khawpui chawmtu tui lakna tur siam hna ‘Augmentation of water supply and construction of 37 mld Water Treatment Plant, Tlawng (Setlak chhuah)’ ami leh zun leh ek thli sawngbawlna ‘Construction of 10MLD STP (Chite)’ ami leh veng hrang hrang atanga zun leh ek thli lakkhawmna sak zawh tawh chu Zirtawpni khan an inhlan chhawng.
Aizawl khawpui chawmtu GAWSS Phase 1&2 hi tui litre maktaduai (MLD) 34.8 pe thei tura duan a ni a. Hetihrual hian khawpuia cheng mihring an pun chak avangin tui pump sa kan khawpkham loh nasat bakah tui nu lutuk vanga pump chawlh tir a ngaih fo avangin tui thianghlim duhkhawp sem tur a awm lo thin a. He harsatna sukiang tur leh tui pump theih zat belhchhah turin SIPMIU, UD&PA department kaltlangin 37MLD WTP sak hna hi Asian Development Bank leh sawrkar laipui Ministry of Housing & Urban Affairs atanga sum dawn hmangin kum 2016 khan bul tan a ni.
Hnathawhna senso atan cheng vaibelchhe 237.91 hman a a ni a, diesel engine leh khawl dang hmangin 2023 September 26-ah tui pump chhuah tan a ni a. P&E Sub-Station Sihhmui atangin 2024 March 29-ah power supply an dawng tan a, a tahtawlin electric khawl hrang hrang endik leh commissioned chhoh zel a ni a, electric khawl hmangin tui pump chhuah a ni ta a ni. Tuisem mamawh dan azirin tui pump a ni a, chawhrualin nitin darkar 12 chhungin tuithianghlim MLD 8 vel pump chhuah a ni a. He scheme hi Aizawl hmar lam chawmtu tur niin, hna hi M/s Eco Protection Engineer Pvt. Ltd. Chennai-in a thawk a, kumkhat chhung a enkawl zui ang. Tunhnaia Vaivakawn- Zohnuai lei che avangin pipeline a chhia a, kumin May 27 atangin tui pump hna chawlhsan rihin, siamtha leh thuai tura beih mek a ni.
Hemi rual hian Aizawl chhuahlama zun leh ek thli sawngbawlna hmunpui 10MLD Sewage Treatment Plant pawh inhlan nghal a ni a, he hna hian Aizawl chhuahlam veng hrang hrang local council 19 huamchhunga zun leh ek thli lakhawmin a sawngbawl mek a ni. Hnathawhna senso atan vbch. 26.76 hman a ni a, kum 2013 atanga thawk tanin 2021 February 6-a zawhfel a ni. A thawktu hi M/s Eco Protection Engineer Pvt Ltd. Chennai a ni a, hna zawh atanga kum 5 chhung a enkawl zui dawn a. February 2026 thleng a enkawl hnu ah PHED hnehah a hlan chhawng tawh ang.
STP Chite-a thli sawngbawlnaa lut tur pipe phum hi km. 28.26 a thui zawhfel a ni tawh a. Hnathawktu hi M/s Tantia Construction Ltd. Kolkata niin, hnathawhnan vbch. 56.76 hman a ni. Tunah in 5238-ah thlunzawm tawhin, mihring 23868 ten an hmang mek a, hemi atanga thli lakkhawm hi scientific method-a uluk taka STP-a sawngbawl vek hnuah Chite luiah chhuah thin a ni.
Hemi rual hian sewerline leh manhole block thin tihfaina tur suction machine pawh inhlan tel a ni a. Heng hna hi O&M period a zawh rualin PHE department hnuaia Division thar – Aizawl Water Transmission Division North leh Sewarage & Sanitation Divisio-in la chhawngin, a enkawl zui nghal dawn a ni.