Defending champion Sinner kal zel
Defending champion Sinner kal zel
Ninganiaah men’s top seed leh champion lai ni bawk Jannik Sinner chuan world number 36 Alexei Popyrin kha inkhelh a zirtir a ni leh hawt a, darkar hnih lek chhunga 6-3 6-2 6-2 hnehna changin Arthur Ashe Stadium-ah serve atangin game hloh a nei lo leh a, US Open khelh meka a match khelh hmasak pahnihah serve atangin game hloh a nei lo ve ve!
World number one Sinner hian US Open third round a luh rualin hard-court Grand Slam bikah match 23 chhung a chak zawn tling a; first round-ah pawh khan game li chiah hlohin Vit Kopriva lakah hnehna nuamsa a lo chang tawh bawk a ni.
Australian Popyrin kha nikum New York third round-a Novak Djokovic hnehtu a nih ve miau avangin Italian Sinner tan pawh fimkhur ve phawt chu a sual lo ang a, mahse, tan phat atangin chak zawk tur a hriatsa tun a, 2023 US Open fourth round-a Alexander Zverev a ngam loh hnua hard-court major bika tlawm a la neih loh kha a la chhawmnung ta zel a ni.
Wimbledon champion Sinner hi nikuma Flushing Meadows title latu a nih bakah two-time defending Australian Open champion a la ni tel cheu bawk!
German third seed Alexander Zverev pawhin a major title hmasaber tur a beisei leh mekna kawngah Briton Jacob Fearnley chu zan lama Louis Armstrong Stadium inkhel pakhatah 6-4, 6-4, 6-4-in a hneh a, US Open third round a lut.
Flushing Meadows-a 2020 finalist lo ni ve tawh chunga Grand Slam title la hlawhchhuak ve thei tlat lo Zverev tan tun kha kum 2018 atanga US Open third round tum sarih a luh zawnna ni tawhin, Roland Garros semi-final pakhat zawka Rafa Nadal nen an inkhelh tuma a kheimit a tihnat avang khan kum 2022 New York tournament lianah a inlan lo.
Third round-a a tum leh tur Canada player hriat hlawh Felix Auger-Aliassime hi a chet dan rin dik harsa fu a ni ve roh a, chu mi chungchang chu German tlangval hian sawiin, “A khelh that loh tuma khel chhe ve tak ni mah se a khelh fuh vek vek tuma khel tha ve thei tak mihring a ni a, tuntuma third round a luh miau avangin a khel tha tluang rih tihna a ni a, ani hmachhawn hi a hautak ang,” a ti.
Third round lut zingah Italian 10th-ranked Lorenzo Musetti pawh telin, unseeded Belgian David Goffin lakah 6-4, 6-0, 6-2-in a chak.
Poland player Kamil Majchrzak pawhin second round match pui zet pakhatah comeback ropui lantirin Russian ninth seed Karen Khachanov lakah 2-6 6-7 (4-7) 6-4 7-5 7-6 (10-5) hnehna a chang.
Russian 15th seed Andrey Rublev pawhin set li inbeihna hautak ve takah American world number 113-na Tristan Boyer chu 6-3 6-3 5-7 7-6 (7-4)-in a hneh ve hram bawk.
Rublev-a tum leh tur Coleman Wong hian history siamin first-round match-ah Aleksandar Kovacevic a lo hneh tawh a, second round-ah pawh set li khelin rinkai zawk Australian Adam Walton a paltlang leh!
First round-a a chak rualin Wong kha Open era-ah Hong Kong mipate zinga Grand Slam singles match-a chak thei hmasaber a ni a, a hnu lama a chak apiangin record tharin a hmuak zel dawn a ni.
Italian 10th seed Lorenzo Musetti pawhin 6-4 6-0 6-2-a Belgian veteran David Goffin hnehin a chipui Flavio Cobolli a hmachhawn leh ang.
24th seed Cobolli hian marathon second-round match dangah tie-break kaltlangin American Jenson Brooksby a hneh a, he inkhel hian darkar li leh a chanve chuang a awh!
Set nga inbeihna dangah Stefanos Tsitsipas chu rin loh takin Germany player Daniel Altmaier chuan 7-6 (7-5) 1-6 4-6 6-3 7-5-in a vaw tla a, eighth seed Alex de Minaur hmachhawn leh tur Altmaier tan tun kha US Open third round a thlen vawi khatna a ni.