Bihar-ah RJD hruaitu Yadav-a’n CM candidate turah inchhal

Rashtriya Janata Dal (RJD) hruaitu, Tejashwi Yadav-a chuan Bihar assembly inthlan lo awm turah eptu tangrualten chief minister atana an vawrh chhuah tur chu amah ni awm takin a sawi chhuak a, a sawina hmunah hian Lok Sabha-a Leader of Opposition Rahul Gandhi-a a awm ve nghe nghe.
Inrinnia Bihar-a Gandhi-a kaihhruaia Voter Adhikar Yatra kalpui hun tawpah Yafav-a hian Chief Minister Nitish Kumar-a chu na takin a sawisel bawk.
“Mi dang tih la chhawng sorkar a ni a, original chief minister kan mamawh a, a lem ni lo,” tiin Yadav-a hian Ara-a vantlang inkhawmah a sawi a. “Hei bak baka mi tih la chhawng sorkar a awm dawn em ni? Ka tih dan a la a ni lo’m ni? Tejashwi-a hian hma a hruai a, sorkar hi a hnungah a kal a. Chief minister lem nge in duh a tak?” tiin mipuite chu a zawt.
Yatra chu ‘zin kawng hriat reng tu’ tia sawiin anmahni thlawptu nuai tam tak an an hip khawm a, BJP chu ‘vu ru-ah’ a puh bawk.
“BJP hian an hlau va, hei hi Tejashwi-a hmathlir tih an duh chhan pawn a ni a; mahse, tih loh tak tak an neih hi kan la hrilh zel dawn cheu va, inthlan puan hunah kan duh chu Bihar-ah hian kan ti dawn a. Bihar-a tute pawhin chief minister lem ni lovin, a tak tak an duh vek a ni,” a ti.
Chief minister vawi hnih lo ni tawh, Lalu Yadav-a fapa, Yadav-a hian pa party chhawm nungin kum 2020 inthlana khan RJD chu party mala bial la tam ber a nihpui a. Kumar-a thachhangdawltu rei lo te a ni a; mahse, JDU hruaitu insiksawiah a chhuak zui ta a ni.
Kum 2025 inthlan lo awm tur hi eptu tangrual, Congress leh RJD telna, Mahagathbandhan tan a pawimawh a, kum 2015 atanga chief minister thutthlenga thu tawh, Kumar-a paih thlak an tum a, tun tumah hian BJP kaihhruai tangrual, NDA chuan chief minister atan an vawrh chhuah leh ngei rin a ni.
RJD chuan an hruaitu, Yadav-a hi eptu tangrualten chief minister atana an vawrh chhuah turin an duh a, hetih lai hian politics hriate chuan Congress-in an pawmpui mai theih an ring lo va, an thawhpui party dangte nen inrawna hmalak an duh ngei rin a ni.
Congress hian chief minister atana an vawrh chhuah turah hian thutlukna an la siam lo va. Kar hmasa khan Gandhi-a chu Yadav-a vawrh chhuah a tha ang em tih an zawh pawhin, “INDIA-a tanghote hi inzahtawn tak leh inepna nei miah lo kan ni vek a. Inthlan pawh a huhovin kan chuh ang a, result pawh a tha ang,” tiin Araria-a Yadav-a nen thuthar lakhawmtute an kawmnaah a la sawi a ni.
A hmain INDIA-a tel ve dang, Samajwadi Party chief Akhilesh Yadav-a chuan Yadav-a hian sorkar ding leh tur a siam dawn niin a lo sawi ve tawh thung